Sheteldik jumysshylar qaı salalarda jumys isteıdi

NUR-SULTAN. QazAqparat – Sheteldik jumys kúshi negizinen Túrkııa, Qytaı, Úndistan, Ózbekstan jáne Ulybrıtanııadan keledi. Bul týraly Eńbek jáne halyqty áleýmettik qorǵaý mınıstri Birjan Nurymbetov málim etti, dep habarlaıdy QazAqparat tilshisi.

«Bizdiń elge shetelden jumys kúshin tartýdyń eki kózi bar. Birinshisinde - shetel mamandary kompanııalar men mekemelerke tartylsa, ekinshisinde – jeke adamdar, ıaǵnı Qazaqstannyń azamattary óziniń jeke sharýashylaǵyna tartady. Kompanııalarǵa tartýǵa qatysty toqtalsaq, bul jerde memlekettik saıasattyń negizgi basymdyǵy – ishki eńbek naryǵyn qorǵaý. Sondyqtan kvota sekildi tetikter iske qosylǵan. Kvota - ol bizdiń elimizde sheteldik jumys kúshine ruqsat berýdiń shegi», - dedi B. Nurymbetov Parlament Senatynda shetelden jumys kúshin tartý taqyrybyna arnalǵan keńeste.

Onyń sózine qaraǵanda, qazirgi tańda elimizde 19 myń sheteldik jumys kúshi qyzmet etýde. Sonyń arasynda 111 memlekettiń ókili bar.

«Jumysqa tartylǵandardyń basym bóligi, ıaǵnı 64 paıyzy qurylys, taý-ken jáne óńdeý ónerkásibi salalarynda jumys isteıdi. Negizgi kelýshi elder retinde Túrkııa, Qytaı, Úndistan, Ózbekstan jáne Ulybrıtanııa tirkelgen. Kompanııa shetel jumys kúshin tartqannan keıin, ol mindetti túrde jergilikti bıýdjetke salym tóleýi (ár mamanǵa 363 myńnan 662 myń teńgege deıin) kerek. Byltyr jumys berýshiler (ruqsat alǵany úshin) 19 myń adamǵa 8,2 mlrd teńge mólsherinde salymyn tóledi. Shetel jumys kúshterin tartyp jatqan kompanııalardyń sany 2 400-di qurady. Dál sol mekemelerde Qazaqstannyń azamattary kadrlyq jaǵynan 96 paıyzdan tómen emes», - dedi mınıstr.