Sheteldik jáne otandyq óndirýshiler arasynda salyq dıskrımınatsııasy bar – Energetıka mınıstri

NUR-SULTAN. QazAqparat – Sheteldik jáne otandyq óndirýshiler arasynda qalyptasqan salyq dıskrımınatsııasy jergilikti taýar óndirýshilerdiń iri jobalarǵa qatysý múmkindigin shektep otyr. QR Energetıka mınıstri Maǵzum Myrzaǵalıev Úkimet otyrysynda osyndaı másele kóterdi, dep habarlaıdy QazAqparat tilshisi.

«Otandyq taýar óndirýshilerdiń iri jobalarǵa qatysý úlesiniń tómendigi – sheteldik jáne otandyq óndirýshiler arasynda qalyptasqan dıskrımınatsııalyq jaǵdaılarǵa baılanysty bolyp otyr. Osylaısha, iri operatorlarǵa berilgen kedendik preferentsııalar nátıjesinde olar sheteldik taýarlardy qosylǵan qun salyǵyn naqty tólemeı satyp ala alady. Al otandyq óndirýshilerden taýarlardy satyp alý kezinde 12% mólsherinde salyq tólenedi.

Básekege qabilettilik deńgeıin arttyrý joldarynyń biri – Salyq kodeksine ózgerister engizý. Bul ózgerister iri jobalar úshin taýarlardy jetkizý kezinde otandyq óndirýshilerdiń ishki aınalymyn qosylǵan qun salyǵynan bosatýdy qamtıdy», - dedi vedomstvo basshysy.

Aıtýynsha, bul shara sheteldik jáne otandyq kompanııalar arasyndaǵy jaǵdaıdy teńestirýge múmkindik beredi.

«Osyǵan oraı, Ulttyq ekonomıka mınıstrligine, Qarjy mınıstrligine jáne «Atameken» Ulttyq kásipkerler palatasyna Energetıka mınıstrligimen birlesip osy usynysty pysyqtaýdy tapsyrýyńyzdy suraımyn», - dedi Maǵzum Myrzaǵalıev.