Sheteldik týrıster Qazaqstannyń qaı óńirlerin tańdaıdy – mınıstrlik jaýaby

ASTANA. QazAqparat – Mádenıet jáne sport mınıstrligi sheteldik týrıster qandaı óńirlerge jıi keletinin atady, dep habarlaıdy QazAqparat.

Mádenıet jáne sport mınıstrliginiń málimetinshe, ótken jyly Mańǵystaý oblysyna 41 myńnan astam sheteldik týrıst kelgen. Ortasha alǵanda, shetelden kelgen qonaqtar Kaspıı teńiziniń jaǵalaýynda 7-12 kún aralyǵynda bolǵan.

Sondaı-aq elimizdegi demalys merziminiń uzaqtyǵy boıynsha alǵashqy úshtikke Almaty jáne Astana qalalary endi. 2022 jyly Almatyǵa 417 myńnan astam sheteldik qonaq keldi. Ortasha alǵanda týrıster ońtústik astanada 3-5 kún ótkizgen.
Byltyr Astanaǵa 238 myńnan astam sheteldik týrıst keldi. Elordada olar orta eseppen 2-3 kún boldy.
Al shetelden kelgen týrısterdiń Qazaqstanda saıahattaý merziminiń ortasha uzaqtyǵy 4 kúndi quraıdy.
«Sapardyń uzaqtyǵy óńirdiń týrıstik tartymdylyǵyn kórsetedi. Mańǵystaý oblysynyń áleýeti óte zor jáne biz ony tolyǵymen iske asyrý baǵytynda belsendi jumys istep jatyrmyz. Mamandardy daıarlaý jáne oqytý, týrıstik ınfraqurylym salý, jańa tikeleı avıareıster ashý boıynsha kelissózder júrgizilip jatyr. Sheteldikter arasynda suranys úlken. Sol sebepti elimizge keletin sheteldik týrısterdiń sanyn arttyrý boıynsha jumysty jalǵastyramyz», – dedi QR Mádenıet jáne sport vıtse-mınıstri Erjan Erkinbaev.