Sheteldik sarapshy qazaqstandyq ónimderdi Eýropaǵa kóptep kirgizýge shaqyrdy

ASTANA. QazAqparat - Lıtvalyq «Ekoagros» kompanııasynyń sarapshysy Vırgınııa Lýkshene Eýropaǵa eksporttalatyn qazaqstandyq ekologııalyq taza ónimderdi sertıfıkattaý qalaı júretinin aıtty, dep habarlaıdy QazAqparat tilshisi.

«Ekoagros» kompanııasy Eýropaǵa tasymaldaý úshin Qazaqstannyń eko-ónimderin sertıfıkattaýmen aınalysady. Osy oraıda V. Lýkshene saparmen elordaǵa kelip, organıkalyq ónim boıynsha sertıfıkattaý men tirkeý júıesi qyzmetkerlerine arnalǵan semınar ótkizýde.

«Eropalyq odaq pen AQSh-ta barlyq óndirýshiler úshin talaptar bar. Bul rette negizgisi eshqandaı hımııalyq qospalardy aralastyrmaýǵa qatysty, sondaı-aq óndiris qorshaǵan ortany qorǵaýǵa negizdelýi tıis», - dedi sarapshy Astanadaǵy semınar barysynda.

Sarapshynyń sózine qaraǵanda, onyń agenttigi qazaqstandyq 18 óndirýshini sertıfıkattaǵan. Bul óndirýshiler astyq ósirýmen jáne onyń eksportymen aınalysady.

«Bizdiń ınspektor sharýashylyq nysandaryna baryp, tekseris júrgizip, hattamany toltyrady. Sonymen qatar, ekinshi sarapshy organıkalyq óndiris talaptaryna sáıkestigi boıynsha atalǵan hattamaǵa baǵalaý júrgizedi. Eger de talaptarǵa saı bolsa, onda ol organıkalyq ónimge sertıfıkat shyǵarady. Ol eki jylǵa jaramdy bolady», - dedi Vırgınııa Lýkshene.

Onyń atap ótýinshe, sertıfıkattaýdan ótken qazaqstandyq ónimderdiń sapasy óte joǵary.

«Qazaqstanda jergilikti naryqty jáne eksportty damytý úshin áleýet óte joǵary. Sizderge osy brendterdi ilgeriletý kerek. Qazaqstandaǵy ónimder joǵary suranysqa ıe, sebebi sapasy jaǵynan talaptarǵa sáıkes keledi. Meniń oıymsha, Qazaqstanda organıkalyq óndiristi damytý úshin tyń serpin berý kerek. Negizinen, astyq jáne et ónimderi sapaly bolyp keledi», - dedi sarapshy.