Sheteldik kompanııalarǵa Qazaqstannyń úzdik áskerı tehnıkalary tanystyryldy

  ASTANA. QazAqparat - KADEX-2018 V halyqaralyq kórmesi aıasynda ótip jatqan «ADVANCED DEF TECH» ǵylymı-praktıkalyq konferentsııasynda «Qazaqstan Injınırıng» AQ basshysy Áset Qurmanǵalıev qorǵanys-óndiristik kesheni (QÓK) salasyndaǵy sheteldik mamandarǵa Qazaqstannyń úzdik áskerı tehnıkalaryn tanystyrdy, dep habarlaıdy QazAqparat tilshisi.

«Bıylǵy «KADEX-2018» V halyqaralyq kórmesi «Qazaqstan Injınırıng» AQ-nyń 15 jyldyǵymen tuspa-tus kelip otyr. «Qazaqstan Injınırıng» kompanııasy úshin kórme mańyzdy oqıǵa bolyp tabylady. Dál osy jerde biz barlyq áleýetterimizdi tanystyryp, óz jumysymyzdy kórsete alamyz. Áleýetti seriktestermen kezdesip, QÓK salasyndaǵy jańashyldyqtardy baıqaımyz», - dedi ol.

Áset Qurmanǵalıev jıynda kompanııanyń jumysy týraly keńirek aıtyp berdi.

«Qazaqstan Injınırıng» elimizdiń qorǵanys-óndiristik kesheni salasyndaǵy holdıng kompanııa bolyp tabylady. Ol birqatar kólik qurastyrý kompanııalaryn biriktiredi. Holdıngtiń kópsalaly tehnologııalyq bazasy ónimdi jasaýdan bastap, iske qosýdy qamtamasyz etýge deıingi jumysty júrgizýge múmkindik beredi. Sondaı-aq, árbir kásiporynnyń óz tájirıbesi bar. Kompanııa óziniń barlyq enshiles kompanııalarynda biryńǵaı óndiristik, tehnologııalyq, qarjylyq jáne kadrlyq saıasatty qamtamasyz etedi. Bul faktorlar «Qazaqstan Injınırıngtiń» áleýeti men keleshegi baryn dáleldeıdi», - dedi ol.

Onyń aıtýynsha, qazirgi ýaqytta kompanııanyń quramyna jıyrmaǵa tarta táýeldi kásiporyn enedi. «KADEX-2018» V halyqaralyq kórmesine kompanııaǵa qarasty túgel derlik kásiporyndar barlyq baǵyt boıynsha qurlyqtaǵy, avıatsııalyq jáne teńizdegi qarýlandyrý  qatysýda.

«Kórmege qatysýshylarǵa bizdiń ónimder qyzyqty bolar degen úmittemiz. Naqtyraq aıtqanda, brondy dóńgelekti «Arlan» mashınasy, elekrondy-optıkalyq ónim, teplovızorlar, áskerı basqarýshy modýlder, katerler, baılanysqa arnalǵan ártúrli qurylǵylar kórmege qoıyldy. Brondy tehnıka, sonyń ishinde jańartylǵan T-72 tankisi, BMP-1, BMP-2, BTR-70 tehnıkalary barshylyq. Sonymen qatar, brondy tehnıkalardy jóndeý men jańartý jumysymen aınalysamyz», - dedi Áset Qurmanǵalıev.

Áset Qurmanǵalıevtyń aıtýynsha, Memleket basshysynyń tapsyrmasymen aldaǵy jyldary qorǵanys-óndiristik kesheni salasyndaǵy 9 kásiporyndarǵa jańǵyrtý jumystary júrgiziledi.

«Sózimdi qoryta kele «Qazaqstan Injınırıng» óziniń qorǵanys-óndiristik kesheni salasyndaǵy kásiporyndaryn tıimdi paıdalanýdy kózdeıtinin atap ótkim keledi. Biz strategııalyq seriktesterdiń bárimen birge iskerlik jáne ózara tıimdi seriktestikke daıynbyz. Barlyqtaryńyzdy bizdiń pavılonǵa shaqyramyn», - dep túıdi Áset Qurmanǵalıev.

Eske sala ketsek, keshe Astanada Elbasy Nursultan Nazarbaevtyń qatysýymen «KADEX-2018» V halyqaralyq kórmesi ashylǵan bolatyn. Kórme  26 mamyrǵa deıin jalǵasady. Kórmege Reseı, Belarýs, Qyrǵyzstan, Armenııa, Túrkııa, Iordanııa, Ázerbaıjan, Izraıl, Italııa syndy 40-tan astam elderdiń ókilderi qatysýda. Sondaı-aq, Belarýs, Belgııa, Bolgarııa, Brazılııa, Germanııa, Izraıl, Úndistan, Ispanııa, Italııa, QHR, Nıderlandy, RF, AQSh, Serbııa sııaqty álemniń 28 eliniń 318 kásiporyny óz ónimderin kórmede usynyp otyr. Kórmeni uıymdastyrýshy - QR Qorǵanys jáne aeroǵarysh ónerkásibi mınıstrligi, «Qazaqstan ınjınırıng» UK» AQ bolyp tabylady.