Sheteldik ınvestorlar «Qazaqstan halqyna» jarnany erikti túrde aýdarady - Toqaev
Prezıdent óz sózinde «Qazaqstan halqyna» qoǵamdyq áleýmettik qorynyń qurylǵany jóninde aıtty.
«Keıbir sheteldik ınvestorlar arasynda Qorǵa jarna aýdarý mindetti me degen suraq týyndaıdy. Jarna aýdarý erikti túrde júrgiziletinin atap ótkim keledi», – dedi Memleket basshysy.
Qasym-Jomart Toqaev kezdesýdi qorytyndylaı kele, elimizde júzege asyrylyp jatqan reformalarmen qatar, keńes te óz qyzmetindegi tásilderdi jańartyp otyrýǵa tıis ekenin atap ótti.
«Men belsendi túrde kómektesýge, negizdelgen sheshimder qabyldaýǵa daıynmyn. Jalpy, men Qazaqstanda qolaıly ınvestıtsııalyq klımat qalyptastyrýǵa basymdyq beremin. Sizderden tyń bastamalar men usynystar kútemin. Keńes ózara yqpaldastyqtyń, ekonomıkany ártaraptandyrýdyń, azamattardyń ál-aýqatyn arttyrýdyń shynaıy ári naqty tetigine aınalýy kerek», – dedi Prezıdent.
Jıyn sońynda Memleket basshysy Keńestiń kelesi 34-shi plenarlyq otyrysynyń kún tártibin jarııalady. Aldaǵy jıyn ekonomıkany dekarbonızatsııalaý jáne tómen kómirtekti tehnologııalardy engizý máselelerine arnalady. Sondaı-aq Prezıdent sheteldik ınvestorlardyń elimizdegi jumystaryna qatysty birqatar ózekti saýalǵa jaýap berdi. Jıyn barysynda Ekonomıka mınıstri Álibek Qýantyrov, Azııa damý banki, Eýropa qaıta qurý jáne damý banki, Citigroup, EY, Exxon Mobil, Chevron, TotalEnergies, Shell, Eni S.p.A., CNPC, Cameco, ArcelorMittal, General Electric jáne basqa da halyqaralyq iri qarjy jáne bıznes qurylymdarynyń jetekshileri sóz sóıledi. Kezdesýdi «Sheteldik ınvestorlardyń qazaqstandyq keńesi» Assotsıatsııasynyń basqarma tóraǵasy Erlan Dosymbekov júrgizdi.