Sheteldik ınvestor Almatyda jelatın shyǵaratyn zaýyt salmaq

ALMATY. QazAqparat – Megapolıstiń negizgi sheteldik ınvestorlary – TMD elderi, Taıaý Shyǵys, AQSh, Túrkııa jáne Izraıl. Bul týraly óńirlik kommýnıkatsııalar qyzmetinde ótken brıfıngide qalalyq kásipkerlik jáne ınvestıtsııalar basqarmasynyń basshysy Berik Soltanbaev málim etti, dep habarlaıdy QazAqparat tilshisi.

Spıkerdiń aıtýynsha, sheteldik ınvestorlardyń biri Almaty ındýstrııalyq aımaǵynda jelatın shyǵaratyn zaýyt salady.

«Osy maqsatta Iskefe túrik holdıngine 4,5 gektar jer telimi bólindi. Kompanııa zaýyt qurylysyna 9,8 mlrd teńge salyp, 100-den astam turaqty jumys ornyn ashýdy josparlap otyr. Zaýyttyń óndiristik qýaty 7 myń tonnadan astam jelatın shyǵarýǵa múmkindik beredi», - dedi ol.

Taǵy bir ınvestjoba – medıtsınalyq ortalyqtyń qurylysy. «International Business Group» JShS bastamasymen jáne 150 jumys ornyn qurýmen bastaldy. Joba quny – 2 mlrd teńge.

Sondaı-aq, iri ınvestor qarajaty esebinen Almaty halyqaralyq áýejaıynyń jańa termınaly salynyp jatyr.

«Jańa termınal áýejaıdyń ótkizý qýatyn jylyna qazirgi 2,5 mıllıon jolaýshydan 14 mıllıonǵa deıin arttyrýǵa múmkindik beredi. Jobanyń jalpy quny – 90 mlrd teńge. Іske asyrý merzimi 2024 jylǵa josparlanǵan», - deıdi Berik Soltanbaev.

Jalpy, bıylǵy birinshi toqsanda Almatyǵa quıylǵan sheteldik ınvestıtsııalar aǵyny 1,6 mlrd AQSh dollaryna jetti, bul ótken jylmen salystyrǵanda 40,4%-ǵa kóp.

«Bıyl 2,1 mlrd teńge somasyna eki sheteldik joba iske asyryldy. Olardyń ishinde tehnologııalyq úderisterdi basqarýdyń avtomattandyrylǵan júıeleri men avarııaǵa qarsy qorǵaý júıeleri shkaftaryn shyǵarý boıynsha ınnovatsııalyq óndiris bar. Jobany Fortune 500 tizimine kiretin, elektrondyq basqarý jáne avtomattandyrý júıeleri naryǵyndaǵy álemdik kóshbasshylardyń biri amerıkandyq Honeywell korporatsııasy júzege asyrady», - dedi spıker.

Foto: vip-masters.ru