Sheteldik ǵalymdarǵa jeńildetilgen vızalar berilmek

ASTANA. QazAqparat – Qazaqstan úzdik ǵalymdardy jeńildetilgen tártiptegi vızalar arqyly tartady. Bul týraly Májilistegi Úkimet saǵatynda QR Áleýmettik kodeksiniń jobasyn tanystyrý kezinde QR Eńbek jáne halyqty áleýmettik qorǵaý mınıstri Tamara Dúısenova aıtty, dep habarlaıdy QazAqparat tilshisi.

«Jańa kóshi-qon saıasatynyń maqsaty – Qazaqstan ekonomıkasyn suranysy bar jáne bilikti kadrlarmen qamtamasyz etý. Munda tıisti máseleler óz sheshimin tappaq. Ekonomıka salalary úshin suranysy bar tehnologııalar boıynsha úzdik oqytýshylar, úzdik ǵalymdar, tapshy kásipter boıynsha mamandardy jeńildetilgen vızalar jáne 10 jylǵa turý quqyǵymen tartý usynylady. Sonymen qatar 300 myń AQSh dollardan kem emes ınvestıtsııa salýdy kózdegen shetel kásipkerleri úshin beretin «Investorlyq vızany» engizý usynylady», - dedi T. Dúısenova.

Budan buryn habarlanǵandaı, Búgin Májilistegi Úkimet saǵatynda QR Eńbek jáne halyqty áleýmettik qorǵaý mınıstri Tamara Dúısenova QR Áleýmettik kodeksi jobasyna engiziletin jańa parametrler otbasylarǵa beriletin memlekettik qoldaýdy keńeıtetinin aıtty. Aldaǵy ýaqytta kópbalaly analarǵa beriletin járdemaqy ósedi.