Sheteldik BAQ-taǵy Qazaqstan: Ýkraınadaǵy jaǵdaıǵa qatysty ustanym, munaı kompanııalaryn sotqa berý jáne saıası reformalar
«Qazaqstan úkimeti iri munaı kompanııalaryn sotqa berdi»
5 sáýir kúni AQSh-taǵy Bloomberg aqparat agenttigi Qazaqstan úkimetiniń Qashaǵan jáne Qarashyǵanaq ken oryndaryn ıgerip otyrǵan kompanııalardy arbıtraj sotyna bergenin jazdy. Agenttik maqalada málimet bergen derekkózdi atamaǵan.
Basylymnyń jazýynsha, Qazaqstan joba seriktesterin tender rásimderin buzdy dep aıyptap otyr. Al Qashaǵan boıynsha merdigerler jumysyn tolyq oryndamady degen. Úkimet joba seriktesteri Qashaǵanda 13 mıllıard dollar, al Qarashyǵanaqta 3,5 mıllıard dollar shyǵyndy shegermeýi tıis degen pikirde.
Talap Qashaǵan úshin 2010 jyldan 2018 jylǵa deıingi, al Qarashyǵanaq úshin 2010 jyldan 2019 jylǵa deıingi kezeńdi qamtyp otyr.
«Osy úshin Qazaqstan bıligi naýryzda Jenevada jáne Stokgolmde Qashaǵan men Qarashyǵanaq isin qadaǵalaıtyn ókilin taǵaıyndaǵan. Al kompanııalar áli kúnge óz tóreshilerin taǵaıyndamapty»,-dep jazady Bloomberg.
«Qazaqstan tikeleı sheteldik ınvestıtsııa tartý boıynsha rekord jańartty»
Grýzııanyń Business Media agenttigi 3 sáýirde Qazaqstannyń ınvestıtsııalyq áleýetine qatysty maqala jarııalady. Onda ótken jyly Qazaqstan 28 mıllıard dollar tikeleı sheteldik ınvestıtsııa (TShI) tartqanyn, bul sońǵy onjyldyqtaǵy rekordtyq kórsetkish ekenin atap ótken. Agenttik Qazaqstannyń Syrtqy ister mınıstrligine silteme jasap, 2021 jyly TShI kólemi 23,8 mıllıard dollar bolsa, bıyl ol kórsetkish 17,7 paıyzǵa óskenin de sóz etken.
«Jyldyń basynda Prezıdent Qasym-Jomart Toqaev Úkimetke jeti jyl ishinde keminde 150 mıllıard dollar ınvestıtsııa tartýdy tapsyrdy. Ol táýelsizdik alǵannan beri Qazaqstanǵa jalpy somasy 370 mıllıard dollardan astam qarjy tartylǵanyn atap ótti. Eldi sheteldik ınvestorlar úshin tartymdy etý úshin úkimet árbir ınvestordy qoldaýǵa baǵyttalǵan birqatar qural ázirlegen. 2022 jyly elde strategııalyq ınvestıtsııalyq kelisim engizildi»,-dep jazady basylym.
«Biz soǵysty toqtatýǵa kómekteskimiz keledi»
2 sáýirde QR Syrtqy ister mınıstriniń orynbasary Roman Vasılenko Berlınge sapary barysynda Deutsche Welle agenttigine suhbat berdi. Ol áńgime barysynda Qazaqstan men Germanııa arasyndaǵy energetıkalyq baılanys, Qazaqstannyń Ýkraınadaǵy jaǵdaıǵa qatysty ustanymy jáne kópvektorly syrtqy saıasaty týraly sóz etedi.
Onyń aıtýynsha, Qazaqstan men Germanııa arasynda energetıka salasyndaǵy yntymaqtastyq jıi talqylanady.
«Qazaqstan men Germanııa arasyndaǵy energetıka salasy boıynsha dıalog dástúrli resýrstardy ǵana emes, sonymen qatar energııa resýrstarynyń jańa kózderin de qamtıdy. Bul jerde men Svevind nemis-shved konsortsıýmynyń Qazaqstanmen 2030 jyldan bastap jylyna 3 mıllıon tonna jasyl sýtegi óndiretin qýattylyǵy 45 gıgavatt kún jáne jel elektr stantsııalaryn salýǵa qol qoıǵan ondaǵan jyldarǵa sozylatyn kelisimshart týraly aıtyp otyrmyn», - dedi ol.
Sonymen birge Vasılenko Qazaqstan Ýkraınadaǵy qantógisti toqtatýǵa jáne janjaldy retteýge qol ushyn berýge umtylyp otyrǵanyn, sondaı-aq buǵan qatysty Prezıdent Qasym-Jomart Toqaev osy máselede araaǵaıyn bolýǵa daıyn ekenin aıtqanyn da atap ótti.
«Álemdik ortalyq bankter 52 tonna altyn satyp aldy»
Bıylǵy 4 sáýirde Reseılik «Interfaks» aqparat agenttigi «Álemdik ortalyq bankter 52 tonna altyn satyp aldy» degen materıal jarııalady. Onda basylym Dúnıejúzilik altyn keńesine (WGC) silteme jasap, dúnıejúzilik ortalyq bankter 2023 jyldyń aqpanynda 51,7 tonna altyn satyp alǵanyn jazady.
Onyń ishinde Qazaqstan 13,1 tonna altyn satyp, álemdegi eń iri altyn satýshy memleketke aınalǵan.
Al álemdegi eń iri satyp alýshy Qytaı boldy, ol 24,9 tonna altyn satyp alǵan. Sonymen birge altyn qoryn toltyrǵan memleketter qatarynda Túrkııa (22,5 tonna), Ózbekstan (8,1 tonna), Sıngapýr (6,8 tonna) jáne Úndistan (2,8 tonna) bar.
Álemniń ortalyq bankterindegi altyn qory on birinshi aı qatarynan ósip keledi. Qańtar aıynda olar 73,7 tonna satyp alǵan.
«Qazaqstan Ázerbaıjan arqyly ótetin tranzıttik dálizdi damytýǵa bar kúsh-jigerin salady»
6 sáýirde QR Saýda jáne ıntegratsııa vıtse-mınıstri Qaırat Tórebaev Trend agenttigine bergen suhbatynda «Orta dáliz» retinde belgili Transkaspıı halyqaralyq kólik baǵytyn damytýdyń Qazaqstan men Ázerbaıjan ekonomıkasyna oń áserin erekshe atap ótken. Onyń aıtýynsha, Qazaqstan bul baǵytty jetildirýge bar kúshin salatyn bolady.
«Biz bul dálizdi damyta otyryp, elderimiz arasyndaǵy taýar aınalymynyń aıtarlyqtaı qarqyn alǵanyn kórip otyrmyz. Óıtkeni Qazaqstan – Qytaı, Eýropalyq Odaq pen TMD elderi úshin negizgi tranzıttik memleket», - dedi mınıstrdiń orynbasary Trend tilshisine.
«Qazaqstan taýarlar qozǵalysyn baqylaýdyń onlaın júıesin iske qosty»
Reseılik iskerlik ınternet-portal BFM.ru basylymy Qazaqstanda 1 sáýirden bastap ilespe júk qujattaryn rásimdeý, sonymen birge taýarlardy onlaın baqylaý júıesi engizilgenin jazdy. «Osylaısha, Astana Reseımen jáne Eýrazııalyq ekonomıkalyq odaq elderimen kóleńkeli saýdany azaıtyp, salyq shyǵynyn joıǵysy keledi»,-delingen maqalada.
Basylymnyń jazýynsha, elektrondy shot-faktýralardyń tolyqqandy iske qosylýy áli qıyndyq týǵyzǵan joq ári júıe 2020 jyldyń jeltoqsan aıynan bastap synaqtan ótken. Business FM-ge suhbat bergen tasymaldaýshylar bul týraly áli eshkim shaǵymdanbaǵanyn aıtqan.
«Kelispeýshilikterdi soǵys arqyly sheshetin ýaqyt emes»
6 sáýirde Syrtqy ister mınıstriniń orynbasary Roman Vasılenko Al Jazeera arnasyna bergen suhbatynda Reseı-Ýkraına qaqtyǵysyn toqtatý úshin dıplomatııaǵa júginýdi usyndy.
«Qaqtyǵysty beıbit jolmen sheshýge degen umtylys bizdiń DNQ-da bar. Keńes Odaǵy ydyraǵannan keıin bizge mura bolyp qalǵan álemdegi tórtinshi ıadrolyq arsenaldy joıdyq. Biz ulttyq múddemizdi qorǵaýdyń eń jaqsy joly dıplomatııa ekenin túsinemiz. Biz osy qaǵıdaǵa adaldyq tanytyp, ony Reseıge, Qytaıǵa jáne Batys elderine úlgi etýdi jalǵastyramyz. Budan bylaı Qazaqstan HHІ ǵasyrda eshqandaı «uly oıyndardy» qoldamaıdy», - dedi Vasılenko Al Jazeera telearnasyna.
«Qazaqstan kóppartııaly demokratııaǵa bet buryp jatyr ma?»
Sáýirdiń 5-inde Jamestown Foundation basylymynda jarııalanǵan maqalada Qazaqstandaǵy jýyrda ótken Parlament saılaýyna sholý jasalǵan.
«Kemshilikterge qaramastan, kezekten tys parlament saılaýy Qazaqstannyń saıası jańǵyrýyndaǵy mańyzdy qadam bolyp otyr. Táýelsizdik alǵannan beri alǵash ret Májiliske alty saıası partııa kirdi. Bir mandatty okrýgter boıynsha 29 mandat úshin 435 kandıdat baq synady. Munyń ózi saıası básekelestiktiń qalyptasyp kele jatqanynyń belgisi», - delingen maqalada.
«Qazaqstannyń Qambar-Ata-1 qurylysyna qansha ınvestıtsııa quıatyny belgili boldy»
Qyrǵyzdyń Kaktus Media agenttigi 6 sáýirde Qambar-Ata GES-1 qurylysy jaıly maqala jarııalaǵan. Basylym QR Energetıka mınıstrligi qoǵamdyq keńesiniń múshesi Almaz Ábildaevqa silteme jasap, Qambar-Ata GES-1 qurylysy bitkennen keıin, Qazaqstan Qyrǵyzstannan jasyl energııa kózin alyp, eldiń ońtústigindegi elektr qýaty tapshylyǵyn óteı alatynyn jazady.
«Qambar-Ata GES-1 qurylysy Qyrǵyzstan, Qazaqstan jáne Ózbekstannyń energetıkalyq qaýipsizdigin de qamtamasyz etedi»,-dedi Almaz Ábildaev.
«Qazaqstanda muqabasy adam terisinen jasalǵan jumbaq qoljazba tanystyryldy»
3 sáýirde Daily Sabah gazetinde jarııalanǵan maqalada Qazaqstannyń Ulttyq akademııalyq kitaphanasynda saqtalǵan muqabasy adam terisinen jasalǵan erekshe qoljazba týraly aıtylady. 1532 jyly kóne latyn tilinde jazylǵan jáne adam terisimen qaptalǵan qoljazba elordamyz Astanadaǵy Ulttyq akademııalyq kitaphananyń sırek basylymdar murajaıyna qoıylǵan.