Sheteldik BAQ-taǵy Qazaqstan: Tájikstan prezıdentiniń Astanaǵa sapary jáne munaı eksportynan túsken tabystyń artýy
Reuters:2022 jyly Qazaqstannyń munaı eksportynan túsken tabysy 50%-ǵa ósti
2 mamyrda Reuters agenttigi Qazaqstannyń ulttyq statıstıka bıýrosyna silteme jasap, elimizdiń munaı eksportynan túsetin tabysy 2022 jyly shıki munaı baǵasynyń ósýine baılanysty 50%-ǵa artqanyn, degenmen kólemi azaıǵanyn jazady.
«QUSB málimetteri boıynsha, qazaqstandyq munaı eksportynyń quny 2021 jyly 31 mıllıard dollardy (65,5 mıllıon tonna) qurasa, 2022 jyly 46,8 mıllıard dollarǵa (65,0 mıllıon tonna) jetti», - delingen maqalada.
Trend.az:Qazaqstan men Tájikstan aýyl sharýashylyǵy salasyndaǵy yntymaqtastyqty keńeıtý týraly qujatqa qol qoıdy
Trend.az basylymy 4 mamyrda jarııalaǵan maqalasynda Astanada Qazaqstan men Tájikstannyń Aýyl sharýashylyǵy mınıstrlikteri arasynda yntymaqtastyqty keńeıtý jónindegi 2023-2025 jyldarǵa arnalǵan jol kartasyna qol qoıylǵany jóninde jazady.
«Qujatqa Tájikstan Prezıdenti Emomalı Rahmon men Qazaqstan Prezıdenti Qasym-Jomart Toqaevtyń qatysýymen resmı delegatsııa ókilderiniń kezdesýinen keıin qol qoıyldy. Sóıtip prezıdentter Tájikstannyń aýyl sharýashylyǵy salasyndaǵy jetistikterin kórsetý úshin Qazaqstanda Tájikstan mádenıeti kúnderin ótkizýge kelisti. Sonymen qatar prezıdentter kezdesýiniń negizgi baǵyttary saýda-ekonomıkalyq yntymaqtastyqty nyǵaıtý, ózara taýar aınalymyn arttyrý, ónerkásip, aýyl sharýashylyǵy, kólik jáne tsıfrlandyrý salalaryndaǵy yntymaqtastyqty damytý boldy», delingen maqalada.
Eske salaıyq, 3-4 mamyr kúnderi Tájikstan prezıdenti Emomalı Rahmon Qazaqstanǵa memlekettik saparmen kelgen edi.
Azertag.az: Prezıdent Ilham Álıev: Ázerbaıjan arqyly qazaqstandyq munaı kólemin kóbeıtý boıynsha kelissózder jalǵasyp jatyr
3 mamyrda Azertag.azagenttigi jarııalaǵan maqalada Ázerbaıjan prezıdenti Ilham Álıevtiń Ázerbaıjan arqyly qazaqstandyq munaı kólemin ulǵaıtý boıynsha kelissózder jalǵasyp jatqanyn aıtqan pikiri berilgen.
Ilham Álıev Shýshada ADA ýnıversıtetiniń 100 jyldyǵyna oraı uıymdastyrylǵan «Úlken Eýrazııanyń geosaıasatyn qalyptastyrý: ótkennen búginge jáne bolashaqqa» atty 4-halyqaralyq konferentsııasyna qatysty. Jıynǵa qatysqan Ázerbaıjan prezıdenti: «Ázerbaıjan arqyly Qazaqstan munaıynyń kólemin ulǵaıtý boıynsha josparymyz bar, qazir kelissózder júrgizilip jatyr. Bizdiń qubyr ınfraqurylymymyzdyń muny jasaýǵa múmkindigi bar»,- dedi Ázerbaıjan prezıdenti.
Akipress: Qazaqstan men Tájikstan odaqtastyq ózara is-qımyl týraly deklaratsııaǵa qol qoıdy
5 mamyrda Akipressagenttigi QazAqparatqa silteme jasap, Qazaqstan prezıdenti Qasym-Joomart Toqaev pen Tájikstan prezıdenti Emomalı Rahmon elder arasyndaǵy odaqtastyq ózara is-qımyl týraly deklaratsııaǵa qol qoıǵanyn týraly jazdy.
«Sizdiń saparyńyz memleketterimiz arasyndaǵy dıplomatııalyq qatynastardyń 30 jyldyǵynda ótip otyr. Munyń sımvoldyq máni bar. Osy jyldar aralyǵynda qazaq-tájik yntymaqtastyǵy ǵasyrlar boıǵy dostyq pen strategııalyq seriktestik rýhynda turaqty damı otyryp, aıtarlyqtaı joǵary deńgeıge jetti. Eki el úkimetteriniń senimdi saıası dıalogy men úılesimdi jumysynyń nátıjesinde qarym-qatynastardyń mazmuny únemi jańaryp keledi», - dedi Toqaev Rahmonǵa arnaǵan birlesken málimdemesinde», - delingen maqalada.
Anadolu Ajansi: Frantsııa Syrtqy saýda mınıstriniń Astanaǵa sapary ekijaqty áriptestikti damytýǵa septigin tıgizedi – Qazaqstan Prezıdenti
2 mamyrda Anadolu Ajansibasylymy Qazaqstan prezıdenti Qasym-Jomart Toqaev seısenbide Frantsııanyń Syrtqy saýda mınıstri Olıve Beshtti qabyldap, onyń elimizge sapary Astana men Parıjdiń áriptestigin damytýǵa eleýli serpin beretinin aıtty dep jazady.
«Bul sapar kóptegen saladaǵy ózara tıimdi yntymaqtastyǵymyzǵa tyń serpin beredi dep sanaımyn. Frantsııa – Eýropadaǵy eń basty seriktesimiz. Yntymaqtastyǵymyzdy odan ári nyǵaıtýǵa múmkindigimiz mol ekenine senimdimin», - dedi Qasym-Jomart Toqaev kezdesý barysynda»,-delingen agenttik maqalasynda.
The Sydney Morning Herald:Aýstralııalyqtar arasynda kóp tanylmaǵan Azııanyń fýtýrıstik qalasy
Mamyr aıynyń 2-sinde The Sydney Morning Herald basylymynda sıdneılik saıahatshy ári jazýshy Ben Grýntýoterdiń elimizdiń bas qalasy Astana jaıly jazǵan maqalasy jarııalandy. Ol óz maqalasynda bas qalanyń erekshe sáýlet ónerine toqtalyp, «Nur Álem», «Han Shatyr», Beıbitshilik saraıy sekildi biregeı ǵımarattar jaıly áńgimeleıdi.
«Álemniń eń ǵajaıyp sáýlet oryndarynyń biri Astanada ornalasqanyn kim bilgen? Óz basym ol jaqqa barmaıynsha, bilgen joqpyn. Qazaqstan – tańǵajaıyp jer, onda adamdy tańǵaldyrarlyq jerler óte kóp»,-dep jazady saıahatshy.