Sheteldik BAQ-taǵy Qazaqstan: Sıngapýr prezıdentiniń sapary, Astana halyqaralyq forýmy jáne Túrkııamen saýda baılanysy
Trend.az: Qazaqstan eýrazııalyq ónerkásiptik yntymaqtastyqty damytý ortalyǵy bolýǵa daıyn
25 mamyrda Trend.az basylymynda jarııalanǵan maqalada Qazaqstan Prezıdenti Qasym-Jomart Toqaevtyń Qazaqstan geografııalyq ornalasýy men múmkindikterin eskere otyryp, Eýrazııalyq ónerkásiptik kooperatsııany damytý ortalyǵy bolýǵa daıyn ekenin aıtqany jazylady. Prezıdent elektromobıl, magıstraldi lokomotıv, vagon, aýyl sharýashylyǵyna arnalǵan jáne jeńil tehnıka qurastyratyn, qurylys materıaldary men hımııalyq buıymdar óndiretin birlesken kásiporyndar osy yntymaqtastyqtyń bir bóligi bola alatynyn atap ótken.
Sonymen qatar Toqaev Eýrazııalyq ekonomıkalyq odaqtyń basqa elderimen birge ınfraqurylym salasyndaǵy mańyzdy birlesken jobalardyń sátti júzege asyrylǵanyn da tilge tıek etken.
Akipress: Qazaqstan Úkimeti orman órtimen kúresýge 1,4 mıllıon dollar bólýdi josparlap otyr
25 mamyrda Akipress.com agenttigi Qazaqstan Úkimeti rezervinen orman órtimen kúreske 623 mln teńgeden astam (1,4 mln dollar) qarajat bóletini týraly jazdy. Basylymnyń aıtýynsha, bólingen qarjy qutqarý operatsııalaryn júrgizýge beıimdelgen Mı-8 tikushaqtaryn, sonymen qosa basqa da qajetti dúnıelerdi satyp alýǵa jumsalady. Qazirgi tańda Qazaqstandaǵy orman órti barǵan saıyn ózekti máselege aınalyp otyr.
Caspiannews: Qazaqstan Transkaspıı marshrýtynyń ótkizý qabiletin arttyrý úshin tsıfrlyq sheshimderdi paıdalanatyn bolady
22 mamyrda Caspiannews basylymy Transkaspıı halyqaralyq kólik baǵytyn nyǵaıtý úshin Qazaqstan tsıfrlandyrýdyń ozyq strategııalaryn qabyldaý arqyly óziniń áleýetin arttyrýǵa nıetti ekenin jazdy. Sıan qalasynda ótken «Qytaı-Ortalyq Azııa» sammıti barysynda Qazaqstan Prezıdenti Qasym-Jomart Toqaev «Bir beldeý, bir jol» bastamasyn júzege asyrýdaǵy birlesken kúsh-jigerdiń mańyzdylyǵyn atap ótti. Ol qytaılyq áriptesterdi Kaspıı teńizi porttarynyń múmkindikterin keńeıtý, olardyń jumysyn tsıfrlandyrý jáne kemelerdi birlesip shyǵarý boıynsha ózara tıimdi yntymaqtastyqqa shaqyrdy. Sondaı-aq Eýropa men Azııa arasyndaǵy tranzıtti jandandyrý úshin Transkaspıı baǵdaryn damytý mańyzdy dep sanaıtynyn tilge tıek etti.
The Print: Astana halyqaralyq forýmynda ekonomıkalyq jáne qaýipsizdik syn-qaterlerine jahandyq áreket etý máseleleri talqylanady
25 mamyrda The Print basylymynda Prezıdent Qasym-Jomart Toqaevtyń bastamasymen maýsym aıynda «saıası dıalogty jańǵyrtý, oń ózgeristerdi yntalandyrý jáne yntymaqtastyqtyń jahandyq kún tártibin qalyptastyrý» taqyrybynda Astana halyqaralyq forýmyn ótkizý josparlanyp otyrǵany jazylǵan. Bul forýmda ekonomıka, qorshaǵan orta jáne qaýipsizdik syn-qaterlerine jahandyq áreket etý qajettiligi týraly aıtylady.
Uzdaily.uz: Bıoártúrlilikti saqtaý boıynsha Ústirttegi yntymaqtastyq máseleleri talqylandy
23 mamyr kúni ózbekstandyq Uzdaily.uz aqparat agenttigi Qaraqalpaqstanda Ózbekstan Respýblıkasy Tabıǵı resýrstar mınıstrligi, Qazaqstan Respýblıkasy Ekologııa jáne tabıǵı resýrstar mınıstrligi, Túrikmenstan Aýyl sharýashylyǵy jáne qorshaǵan ortany qorǵaý mınıstrligi ókilderiniń qatysýymen ótken jıyn týraly jazady.
Otyrysta Ortalyq Azııa sútqorektilerin qorǵaý jáne olardyń tabıǵı mıgratsııasyn qamtamasyz etý boıynsha is-qımyl jospary aıasynda birqatar mindetteme bekitildi.
Thestraitstimes: Prezıdent Halıma ıAkob: «Qazaqstan men Ózbekstan jobalardy júzege asyrýǵa, Sıngapýrmen bıznes júrgizý múmkindikterin zertteýge múddeli»
25 mamyrda Thestraitstimes basylymynda Sıngapýr prezıdenti Halıma ıAkobtyń Qazaqstan men Ózbekstanǵa sapary jaıly jazylǵan. Basylymnyń dereginshe, Halıma ıAkob eki sapary týrasynda sóılegen sózinde Qazaqstan da, Ózbekstan da Sıngapýrmen túrli jobalardy júzege asyrýǵa jáne kompanııalarmen bıznes múmkindikterin zertteýge múddeli ekenin jetkizgen.
«Eki elmen de túrli kelisimderge qol qoıý sıngapýrlyq kompanııalarǵa ekonomıkalyq turǵyndan kóptegen múmkindikterge qol jetkizýge jol ashady», - dedi Halıma ıAkob Ortalyq Azııanyń eki eline jasaǵan bes kúndik memlekettik saparynyń sońynda.
Sonymen qosa basylymnyń jazýynsha, Halıma ıAkob sapardyń mańyzdy nátıjeleriniń biri retinde Qazaqstanmen qyzmet kórsetý jáne ınvestıtsııalar týraly kelisimge qol qoıylǵany jóninde aıtqan.
Sondaı-aq ol Sıngapýr men Qazaqstan bıznes múmkindikterin ǵana emes, týrızm sektoryn keńeıtýge de nazar aýdaryp otyrǵanyn tilge tıek etken. Osyǵan oraı, Sıngapýr prezıdentiniń aıtýynsha, «Astana Eır» kompanııasynyń eki el arasynda tikeleı áýe qatynasyn ashý josparlanyp otyr.
Daily News: Azııalyq VB týrnırinde Qazaqstan Shrı-Lankany jeńdi
Daily News basylymy voleıboldan Qazaqstan áıelder komandasy Nepal Sports-ta ótken Ortalyq Azııa voleıbol qaýymdastyǵy Kýbogynyń «V» tobynda jeńiske jetkenin habarlady. Áıelder arasyndaǵy týrnırdiń ekinshi matchynda bizdiń jerlester Shrı-Lankadan taǵy da basym túsken. Esep Qazaqstannyń paıdasyna - 1:3.
Silkroadbriefing: Túrkııanyń Ortalyq Azııamen kópjaqty saýdasy: qazirgi jaǵdaıy men keleshek perspektıvalary
22 mamyrda Silk Road Briefing basylymy Túrkııanyń Ortalyq Azııa elderimen saýdasynyń damý perspektıvalary týraly maqala jarııalady.
«Ortalyq Azııanyń energetıkalyq sektory jáne Qazaqstan, Túrikmenstan jáne Ózbekstannyń tabıǵı kómirsýtegi qorlary basqa sektorlarǵa qaraǵanda ekonomıkalyq turǵydan mańyzdyraq. Tabıǵı gaz qory boıynsha Túrikmenstan álemde tórtinshi orynda tursa, Qazaqstan men Ózbekstannyń da qomaqty qory bar, munaı kólemi boıynsha Qazaqstan álemde 11-orynda», - delingen maqalada.