Sheteldik BAQ-taǵy Qazaqstan: Ázerbaıjan prezıdentiniń sapary, Qytaımen vızasyz rejım jáne Kaspııdegi yntymaqtastyq
Trend.az:Ázerbaıjan men Qazaqstan birqatar qujattarǵa qol qoıdy
10 sáýirde Trend.az habarlaǵandaı, Astanada Ázerbaıjan Prezıdenti Ilham Álıev pen Qazaqstan Prezıdenti Qasym-Jomart Toqaevtyń kezdesý qorytyndysy boıynsha ekijaqty qujattarǵa qol qoıý rásimi ótti.
Eki eldiń basshylary Qazaqstan men Ázerbaıjannyń Joǵary memleketaralyq keńesin qurý týraly hattamaǵa, dıaspora men shaǵyn jáne orta bıznestiń jumysy, ǵylymı jáne mádenı yntymaqtastyq týraly, sonymen birge QR Prezıdenti Teleradıokesheni men Ázerbaıjan memlekettik aqparat agenttigi arasyndaǵy yntymaqtastyq týraly memorandýmǵa qol qoıdy.
Caspian News: Ázerbaıjan men Qazaqstan «Orta dálizdiń» barlyq múmkindigin paıdalanýǵa kelisti
Caspian News basylymynda sáýirdiń 12-si kúni jarııalanǵan maqalada Ázerbaıjan Prezıdenti Ilham Álıevtiń 10 sáýirdegi Qazaqstanǵa sapary kezinde Ázerbaıjan men Qazaqstannyń «Orta dáliz» dep atalatyn Transkaspıı halyqaralyq kólik baǵytynyń barlyq múmkindigin paıdalanýǵa keliskeni jazylǵan.
«Astanada ótken birlesken baspasóz májilisinde Qazaqstan Prezıdenti Qasym-Jomart Toqaev Ortalyq Azııa eliniń Kaspıı teńizi jaǵalaýyndaǵy kórshisi Ázerbaıjanmen «Orta dálizdiń» áleýetin tolyq kólemde paıdalaný mańyzdy ekenin aıtty», - delingen maqalada.
Reuters:Qazaqstan iri munaı kompanııalaryn shyǵynǵa baılanysty arbıtraj sotyna bermek
Reuters agenttigi 11 sáýirde Qazaqstannyń energetıka mınıstri Almasadam Sátqalıevke silteme jasap, Qazaqstannyń Qashaǵan jáne Qarashyǵanaq munaı ken oryndaryn ıgerýshi kompanııalarǵa qarsy arbıtrajdyq is qozǵaǵanyn habarlady. Mınıstr operatorlarǵa qarsy sáıkesinshe 13 mıllıard dollar jáne 3,5 mıllıard dollar kóleminde sotqa shaǵym túskenin aıtty.
«Men bul sot protsesteri Qazaqstan halqynyń múddesi úshin qozǵalǵanyn ǵana aıta alamyn», - dedi Almasadam Sátqalıev seısenbi kúni.
TASS:Reseı men Qazaqstannyń joǵary laýazymdy tulǵalary Kaspıı teńizi aımaǵyndaǵy yntymaqtastyqtyń mańyzyn atap ótti
Sáýirdiń 11-i kúni Reseıdiń TASS aqparat agenttiginiń habarlaýynsha, Reseı syrtqy ister mınıstri Sergeı Lavrov pen Máskeýge saparmen barǵan Qazaqstan premer-mınıstriniń orynbasary - syrtqy ister mınıstri Murat Nurtileý Kaspıı teńizi aımaǵyndaǵy kópjaqty yntymaqtastyqtyń mańyzyna toqtalyp ótti.
«Kaspıı teńizi aımaǵyndaǵy kópjaqty yntymaqtastyqtyń mańyzdylyǵy atap ótildi, ol qazirgi halyqaralyq jaǵdaıǵa táýeldi bolmaýy kerek», - delingen Reseı SІM málimdemesinde.
Korea JoongAng Daily:Koreıa men Qazaqstan paıdaly qazbalar men ınfraqurylym salasyndaǵy mańyzdy jobalar boıynsha yntymaqtastyqty kúsheıtedi
Korea JoongAng Daily Ońtústik Koreıanyń ulttyq kúndelikti gazetiniń JoongAng aǵylshyn tilindegi basylymy 14 sáýirde Koreıanyń Ónerkásip mınıstrligine silteme jasap, Koreıa men Qazaqstan negizgi paıdaly qazbalar men iri ınfraqurylymdyq jobalar boıynsha ekijaqty yntymaqtastyqty keńeıtýge kelisti dep habarlady.
Bul týraly ýaǵdalastyqqa 14 sáýirde Seýlde Koreıanyń Ónerkásip mınıstri Lı Chan ıAn men Qazaqstan premer-mınıstriniń birinshi orynbasary Roman Sklıardyń kezdesýi barysynda qol jetkizildi.
Taraptar Qazaqstan men Koreıa túrli ınfraqurylymdyq jáne energetıkalyq jobalarda, máselen, Shymkent qalasyndaǵy kombınırlengen tsıkldi zaýyt salýda yntymaqtasyp, jumys istep jatqanyn atap ótti. Mınıstr Lı koreılik fırmalardy Qazaqstannyń energetıka jáne mıneraldyq sektorlarynda jańa kelisimshart jasaıtyn jańa jobalardy qarastyrýǵa shaqyrdy.
People’s Daily:Qytaı-Eýropa júk poıyzy Sıan qalasynan Qazaqstanǵa jol tartty
Sáýirdiń 11-i kúni Qytaıdyń People's Daily gazeti materıaldyq emes mádenı murany tasymaldaıtyn Qytaı-Eýropa júk poıyzy Qytaıdyń soltústik-batysyndaǵy Shensı provıntsııasynyń Sıan qalasyndaǵy Sıan halyqaralyq portynan Qazaqstanǵa jol tartqanyn habarlady.
«Soltústik Qazaqstan oblysyndaǵy jergilikti áıelder men balalarǵa Sıan qalasyndaǵy balalardyń salǵan sýretteri men dostyq sezimin bildiretin hattarmen qosa, materıaldyq emes mádenı muralar, onyń ishinde boıalǵan oramaldar, qýyrshaqtar jáne qaǵaz qıyndylarynan jasalǵan jumystary jiberildi. Poıyzdy iske qosý kezinde Qytaıda bilim alyp jatqan qazaqstandyq stýdentterge arnalǵan is-shara ótkizilip, olarǵa Qytaıdyń materıaldyq emes mádenı muralary, sonyń ishinde keste, betke arnalǵan maskalar, balshyqtan jasalǵan músinder, qaǵaz qıyndylarynan jasalǵan jumystar tanystyryldy»,-delingen maqalada.
Jamestown Foundation, Eurasia Daily Monitor:Qazaqstan Reseı men Qytaıdy baılanystyratyn gaz qubyry jobasyn usynyp otyr
Eurasia Daily Monitor 12 sáýirde Reseı men Qytaıdy Qazaqstan aýmaǵy arqyly baılanystyratyn jańa halyqaralyq gaz qubyryn salý týraly Qazaqstannyń usynysy týraly habarlady.
«Jańa qubyr jobasy tabıǵı gaz resýrstaryn Qazaqstannyń shyǵys aımaqtaryna jetkizý úshin qajet. Joba boıynsha sońǵy sheshim 1 mamyrǵa deıin qabyldanýǵa tıis. Tutastaı alǵanda, usynylyp otyrǵan qubyr reseılik gazdy Qazaqstannyń shyǵys aımaqtary arqyly Qytaıǵa jetkizýdiń eń jyldam ári qysqa joly bolady dep kútilýde. Alaıda naqty málimetter áli jarııalanǵan joq», - delingen maqalada.
Moldpres:Jaqynda Moldova-Qazaqstan bıznes forýmy ótedi
Moldovanyń Moldpres memlekettik aqparat agenttigi 11 sáýirde jarııalanǵan maqalada Moldova premer-mınıstri Dorın Rechean men Qazaqstannyń Moldovadaǵy elshisi Almat Aıdarbekovtiń kezdesýinde talqylanǵan ekijaqty bıznes-forýmdy uıymdastyrý jospary týraly aıtylǵan.
«Resmı tulǵalar eki memleket arasyndaǵy qalyptasqan qarym-qatynastarǵa baǵa berip, ekonomıkalyq yntymaqtastyq áleýetin paıdalaný máselelerin talqylady», - dep jazady agenttik.
Eurasianet:Qytaı-Orta Azııa: «Bolattan jasalǵan túıe kerýeni» qaıda bara jatyr?
Eurasianet saıtynda 11 sáýirde Qytaıdyń Qazaqstandaǵy elshisi Chjan Sıaoǵa silteme jasalǵan maqalada Ortalyq Azııa men Qytaı arasyndaǵy, onyń ishinde kólik jáne logıstıka salasyndaǵy yntymaqtastyqty damytýǵa basa nazar aýdarylǵan. Maqalada Qazaqstan Respýblıkasy Syrtqy ister mınıstrliginiń Erekshe tapsyrmalar jónindegi elshisi Murat Muqyshevtyń Qazaqstannyń Shanhaı yntymaqtastyq uıymy (ShYU) boıynsha ulttyq úılestirýshisi qyzmetine jýyrda taǵaıyndalǵany, elshi Chjan Sıaonyń Qazaqstan Respýblıkasy Indýstrııa jáne ınfraqurylymdy damytý mınıstri Marat Qarabaevpen kezdesýi jaıly jazylǵan.
Commonspace.eu: Qazaqstan men Qytaı ekijaqty vızasyz rejım engizedi
Commonspace.eu saıtynda sáýirdiń 13-i kúni jarııalanǵan maqalada Qazaqstan men Qytaıdyń óz azamattary úshin ózara vızasyz rejım engizý josparlary týraly aıtylǵan.
«Sársenbi kúni Qazaqstannyń Syrtqy ister mınıstrligi Qazaqstan úkimeti men Qytaı úkimeti arasyndaǵy vızalyq talaptardan ózara bosatý týraly kelisimge qol qoıý týraly qaýly jobasyn qoǵamdyq talqylaýǵa shyǵardy», - dep habarlaıdy basylym.
Kelisimge Qytaı men Qazaqstan syrtqy ister mınıstrleri mamyr aıynda Prezıdent Qasym-Jomart Toqaevtyń Qytaıǵa memlekettik sapary kezinde qol qoıady dep kútilýde.
Nazerke Súıindik