Sheteldik BAQ-taǵy Qazaqstan: astyq pen munaı eksportynyń jańa baǵyttary, Sırııamen yntymaqtastyq jáne ejelgi pıramıda
Trend.az: Qazaqstannyń iri qalalarynda elektrmen zarıadtaý stansalarynyń jelisi salynbaq
Ázerbaıjandyq Trend.az basylymy 10 tamyz kúni Qazaqstannyń Indýstrııa jáne ınfraqurylymdyq damý mınıstrliginiń elektromobılder ınfraqurylymyn jaqsartý jospary týraly aqparat jarııalady.
Basylymnyń jazýynsha, qazirgi tańda «Jasyl Damý» AQ-nyń bastamasymen Qazaqstannyń iri qalalary men Almaty – Astana baǵytyndaǵy kúre jolda elektr jaǵarmaı quıý stansalarynyń ınfraqurylymyn damytýǵa arnalǵan joba iske asqan.
«Qazir Astanada elektromobılderdi qýattaıtyn 51 stansa, Almatyda 52, sondaı-aq Pavlodar men Aqtaý qalalarynda jáne Astana – Şýchınsk baǵytyndaǵy avtojolda bir-bir stansadan qoıylǵan. Sonymen qatar Qazaqstanda turǵyndar men kásiporyndar salǵan birneshe jeke elektr stantsııalary bar»,-delingen habarlamada.
Interfax: Qazaqstan suranysqa ıe sheteldik mamandardy qabyldaý tártibin jeńildetpek
Reseılik Interfax agenttigi QR Premer-Mınıstri Álıhan Smaıylovtyń tıisti vedomstvolarǵa Qazaqstanda kásipteri suranysqa ıe sheteldikterdiń elge kelýin jeńildetýdi tapsyrǵanyn habarlady.
«Eńbek mınıstrligi Syrtqy ister mınıstrligimen birlesip, Qazaqstanda olardyń áleýetin odan ári iske asyrý úshin elge kerekti maman ıelerin nemese shetelde tabysty bıznes-jobalar júrgizetin sheteldik azamattardyń elge kirý tártibin jeńildetý qajet», - dep agenttik Á.Smaıylovtyń sózine silteme jasaıdy.
Sondaı-aq agenttik Premer-Mınıstr eldiń vedomstvolaryna bolashaǵy zor sheteldik bıznesmenderdi de Qazaqstanǵa jumysqa tartý boıynsha sharalar qabyldaýdy tapsyrǵanyn da atap ótken.
Sana.sy: Sırııa men Qazaqstan ekijaqty qarym-qatynastar men dıplomatııalyq belsendilikti arttyrý máselesin talqylady
9 tamyzda sırııalyq Sana Syrian Arab News Agency agenttigi Sırııa Syrtqy ister jáne ekspatrıanttar isteri mınıstri Feısal Mıkdad Qazaqstannyń Lıvandaǵy Elshisi Rasýl Jumalyny jáne onymen birge kelgen delegatsııany qabyldaǵany týraly jazdy.
«Mıkdad Qazaqstannyń Sırııany qoldaýdaǵy ustanymyn, sondaı-aq Astana kezdesýi barysyndaǵy kúsh-jigerin joǵary baǵalap, onda qol jetkizilgen mańyzdy nátıjelerdi atap ótti»,-deıdi basylym.
Aqparat agenttiginiń sózinshe, Rasýl Jumaly Qazaqstannyń Sırııamen barlyq salada ekijaqty baılanysty nyǵaıtýǵa degen yntasyn bildirip, Damaskide ál-Farabı atyndaǵy mádenı ortalyqtyń ashylýyna atsalysýyǵa daıyn ekenin jetkizdi.
Trend.az: Qazaqstan men Ázerbaıjan Baký-Sýpsa munaı qubyry arqyly munaı jetkizý perspektıvalaryn talqylady
Ázerbaıjandyq Trend.az basylymy Qazaqstan men Ázerbaıjan Baký-Sýpsa baǵyty boıynsha munaı tasymaldaý perpektıvalaryn talqylaǵany jóninde jarııalady.
«Biz qazirdiń ózinde Baký-Tbılısı-Djeıhan munaı qubyry arqyly qazaqstandyq munaıdy eksporttaý týraly kelisimderge qol jetkizdik, endi Baký-Sýpsa arqyly jetkizýdi bastaý múmkindigin talqylap jatyrmyz. Buǵan qosa buryn habarlaǵanymyzdaı, Qazaqstan «Dostyq» qubyry arqyly Germanııaǵa munaı jetkizýdi bastady», - dep jazady basylyp QR Energetıka mınıstri Almasadam Sátqalıevke silteme jasap.
Sondaı-aq basylymnyń aıtýynsha, bul tasymaldaý Qazaqstan munaıynyń tranzıtine qatysty buryn jasalǵan kelisimderge sáıkes júzege aspaqshy.
Caspian News: Qazaqstan men BAÁ astyq eksportyn tasymaldaý úshin jańa baǵyt qurý týraly kelissózder júrgizip jatyr
8 tamyzda Caspian News agenttigi Ortalyq Azııadaǵy eń iri astyq óndirýshi el sanalatyn Qazaqstan iri logıstıkalyq Abu Dhabi Ports Group (ADP) kompanııasymen qazaqstandyq aýyl sharýashylyǵy ónimderiniń eksportyn Iran men Parsy shyǵanaǵy porttary arqyly tasymaldaýǵa múmkindik beretin birlesken kásiporyn qurý týraly kelissózder júrgizip jatqanyn habarlady.
Dúısenbide Qazaqstannyń Saýda jáne ıntegratsııa mınıstri Serik Jumanǵarın men Simatech Shipping and Forwarding kompanııasynyń bas dırektory Davýd Taftı kezdesip, Afrıkanyń shyǵys jaǵalaýyndaǵy naryqtardy baılanystyratyn qazaqstandyq eksport úshin eń qysqa tikeleı joldy qurý múmkindigin talqylady. Bul - Úndistan, Taıaý Shyǵys, Pákistan jáne Parsy shyǵanaǵy baǵyttary.
«Ótken dúısenbi kúni Qazaqstannyń saýda jáne ıntegratsııa mınıstri Serik Jumanǵarın men Simatech Shipping and Forwarding kompanııasynyń basshysy Davýd Taftı kezdesip, Qazaqstannan eksporttalatyn taýarlar úshin qysqa ári tikeleı marshrýt qurý maqsatynda Afrıka, Úndistan, Taıaý Shyǵys, Pákistan jáne Parsy shyǵanaǵynyń shyǵys jaǵalaýy naryqtaryn qarastyrdy»,-dep jazady basylym.
Agenttiktiń jazýynsha, kelissózder barysynda taraptar Kaspıı teńizi arqyly Iranǵa júk jetkizýdiń ártúrli nusqasyn da talqylaǵan.
Interfax: Shilde aıynda Qazaqstannyń halyqaralyq rezervteri 0,1%-ǵa ósip, 94,4 mlrd dollardy qurady
9 tamyzda reseılik Interfax basylymy Qazaqstannyń halyqaralyq rezervteri 0,1%-ǵa ósip, 94,4 mlrd dollardy qurady degen aqparatty jarııa etti.
«QR Ulttyq bankiniń jalpy rezervteri men Ulttyq qordyń aktıvterin qosa alǵanda, Qazaqstannyń halyqaralyq rezervteri shilde aıynda 94,385 mlrd. AQSh dollaryn qurap, ótken aımen salystyrǵanda 0,1%-ǵa, al jyl basynan beri 4,6%-ǵa artty»,-dep jazady basylym QR Ulttyq bankine silteme jasap.
Basylymnyń aıtýynsha, Ulttyq qor aktıvteri 2023 jylǵy maýsymmen salystyrǵanda 0,68% - ǵa jáne 1 qańtarmen salystyrǵanda 8%-ǵa ósip, 60 202 mlrd dollardy quraǵan.
TheBellinghamHerald: Qazaqstanda kóne pıramıda tabyldy
Amerıkalyq The Bellingham Herald basylymy 8 tamyzda Qazaqstannyń Abaı oblysynda kóne pıramıda tabylǵany jóninde aqparat jarııalady.
Basylym Eýrazııa ulttyq ýnıversıtetiniń baspasóz qyzmetine silteme jasap, bylaı dep jazady: «Abaı oblysy Abaı aýdany Toqtamys eldi mekeniniń janyndaǵy Qyryqúńgir keshendi eskertkishinde arheologııalyq qazba jumystary júrgizilip jatyr. 2014 jyldan beri EUÝ tarıh fakýlteti arheologııa jáne etnologııa kafedrasynyń ǵalymdary qazba jumystaryn jasap júr, oǵan ýnıversıtet stýdentteri men magıstranttary da atsalysýda. Júrgizilgen zertteý jumystarynyń nátıjesinde Eýrazııa dalasynda buǵan deıin kezdespegen, bizdiń dáýirimizge deıingi ekinshi myńjyldyqtyń basy, ıaǵnı osydan tórt myń jyl burynǵy qola dáýiriniń iri kólemdi dala pıramıdasy tabyldy».
«Dala pıramıdasy asa dáldikpen salynǵan, alty qyrly. Árbir qyrynyń arasy on úsh metr jáne segiz qatar taspen qalanǵan. Ortasynda birneshe sheńberi bar. Bul - óte kúrdeli keshendi qurylys. Sol keshendegi qurylystyń syrtyndaǵy qabyrǵalarynda ártúrli janýarlardyń, ásirese, jylqynyń sýretteri kóp beınelengen. Bul, ıaǵnı, sol kezeńniń ózinde jylqy kýlti basym bolǵanyn sol tas qurylystyń aınalasynda jylqy súıekteriniń tabylýy dáleldep otyr», - deıdi tarıhshy ǵalym, EUÝ arheologııa jáne etnologııa kafedrasynyń meńgerýshisi Ulan Úmitqalıev.