Sheteldik avtokólikterdi zańdastyrý: Halyqqa qyzmet kórsetý ortalyqtarynyń jumys kestesi ózgerdi

ALMATY. QazAqparat – Elimizde sheteldik avtokólikterdi zańdastyrýǵa oraı Mamandandyrylǵan halyqqa qyzmet kórsetý ortalyqtarynyń jumys kestesi ózgerdi, dep habarlaıdy QazAqparat tilshisi.

23 qańtarda elimizde sheteldik avtokólikterdi zańdastyrý bastaldy. Osyǵan oraı, Memlekettik korporatsııa qyzmet kórsetýdi jaqsartý maqsatynda MHQO-lardyń jumys kestesin ózgertý týraly sheshim qabyldady.

«Azamattarǵa arnalǵan úkimet» memlekettik korporatsııasy Almaty qalasy fılıalynan habarlaǵandaı, avtokólikterdi zańdastyrý boıynsha memlekettik qyzmet kórsetetin MHQO-lar dúısenbi jáne senbi kúnderi aralyǵynda saǵat 9:00-den bastap 20:00-ge deıin jumys isteıdi. Osy jumys kestesi boıynsha ortalyqtar kelýshilerdi 2023 jyldyń 6 aqpanyna deıin qabyldaıdy.

Almaty qalasynda avtokólikterdi zańdastyrý úshin azamattardy qabyldaıtyn MHQO-lardyń mekenjaıy:

Almaty qalasynyń № 1 mamandandyrylǵan HQO- .Saıaly sh / a, Aqqaınar kóshesi, 1

Almaty qalasynyń № 2 mamandandyrylǵan HQO – Maılın kóshesi, 85

Almaty qalasynyń № 5 mamandandyrylǵan HQO – Qulja dańǵyly, 9K

Almaty qalasynyń № 6 mamandandyrylǵan HQO – Kemel sh / a., Aqsýat kóshesi, 118

Aıta keteıik, sheteldik avtokólikterdi zańdastyrý jumystary 2023 jyldyń 1 shildesine deıin jalǵasady.

Eske salsaq, elimizde sheteldik avtokólikterdi zańdastyrý bastalǵan kúni Almatyda 84 adam HQO-ǵa júgingen edi.