Sheteldik áriptester «QazAqparat» arqyly Qazaqstandy Táýelsizdik kúnimen quttyqtaýda

ASTANA. QazAqparat - Qazaqstan Respýblıkasynyń Táýelsizdik kúni merekesi qarsańynda «QazAqparat» HAA áriptesteri men Qazaqstandaǵy dıplomatııalyq ókildikter tarapynan quttyqtaýlar kelip túsýde.

Atap aıtqanda, Birikken Arab Ámirlikteriniń Elshiligi «QazAqparat» arqyly elimizdi Táýelsizdik kúnimen quttyqtady. «Qazaqstan Prezıdenti Nursultan Nazarbaevtyń dana basshylyǵyndaǵy memleketke órkendeý men damý tileımiz» delingen quttyqtaý hatynda.

Sondaı-aq, Irak Respýblıkasynyń Qazaqstan Respýblıkasyndaǵy elshiligi Táýelsizdik kúni merekesine oraı quttyqtap, «baýyrlas eki eldiń arasyndaǵy barlyq salalardaǵy yntymaqtastyq qarym-qatynastardyń úzilmeýin tilegen».  

Al Ózbekstannyń ulttyq aqparat agenttigi «ÓzA» «QazAqparat» ujymyn jáne agenttik arqyly barsha Qazaqstan halqyn Táýelsizdiktiń 26 jyldyǵymen quttyqtap hat joldady. «Ózbek jáne qazaq halqy - jaqyn ári jaqsy kórshi, tamyry bir baýyrlar. Qazaqstannyń táýelsizdik jyldary jetken jetistikteri biz úshin de qýanysh syılaıdy. Ózbekstan Ulttyq aqparat agenttiginiń ujymy týysqan Qazaqstan halqyna beıbitshilik, otbasylaryna qut-bereke tileıdi. Áriptesterimizge halyqqa qýanyshty habarlardy jetkizýden talmasyn deımiz», delingen quttyqtaýda.