Shetelderdegi etnıkalyq qazaqtar arasynda «Ata joly» mıgratsııalyq kartalaryna suranys artqan
Joba aıasynda tarıhı Otanyna oralǵandarmen QR Premer-Mınıstriniń orynbasary Tamara Dúısenova kezdesti. Júzdesý barysynda qandastar joba týraly pikirlerin aıtyp, elde atqarar jumysynyń josparyn tanystyrdy. Olardyń arasynda densaýlyq saqtaý, munaı jáne gaz, qurylys, bilim berý, ІT salasynyń mamandary bar.
Máselen, Izraılden kelgen Bekjan Qońyrbaev Anestezıologııa qyzmetindegi kemshilikterdi atap ótti. Ol saladaǵy jaǵdaıdy jaqsartý úshin sheteldik tájirıbeni qoldanýǵa ázir ekenin jetkizdi.
Saıan Habıdenov qazir Atyraýda zaýyt salý jónindegi halyqaralyq jobany iske asyrýǵa qatysyp jatyr. Onyń Reseıdiń Sýrgýt qalasynda munaı jáne gaz salasynda 13 jyldyq tájirıbesi bar. Eńbek jolyn qatardaǵy maman retinde bastap, mansap satysynda orta býyn basshysyna deıin ósken. Qazirgi ýaqytta ol úzdik tájirıbelerdiń Qazaqstanda qoldanylýyna atsalysýda.
Mońǵolııadan kelgen Hamza Tilek – ІT-maman. Qazir Astana-hab aıasynda jobany júzege asyrýdy josparlap otyr.
Bolat Ábildın – qurylys salasynyń tájirıbeli qyzmetkeri. Injener-qurylysshy retinde Máskeýde (RF) birqatar nysandardyń qurylysyna qatysqan. Ol tarıhı Otanynda salanyń damýyna úles qossam degen nıetpen kelgenin atap ótti. Qurylys mamandardyń biliktiligin udaıy jetildirip otyrý qajettigine de mán berdi. Bul iske Bul iske ózi de aralasýǵa ázir.
Túrkııadan kelgen qandasymyz Shaban Dınchtıýrk Qazaqstanǵa túrli salada ınvestorlardy tartýǵa kúsh salyp júr. Kommýnaldyq sharýashylyq, medıtsına baǵyttarynda júzege asqan jobalary týraly aıtyp ótken ol keler jyly týrıstik kompanııa ashýdy josparlap otyr. Qazaqstanǵa jylyna kem degende 100 myń týrıst ákelýdi maqsat etipti.
Júzdesýge qatysqan qandastarymyz «Ata joly» kartasyn engizý jobasyn úlken qýanyshpen qabyldaǵanyn jetkizdi. Oǵan sheteldegi ózge de etnıkalyq qazaqtar qyzyǵýshylyq bildirip jatqanyn aıtty.
«Úkimet «Ata joly» kartasyn paıdalanǵysy keletinderge qoldaý kórsetýge daıyn. Sizderdiń usynystaryńyz boıynsha jobany jetildirýge qatysty tıisti memlekettik organdarǵa tapsyrmalar beriletin bolady. Qazaqstannyń damýyna qoldan kelgenshe úles qosýǵa degen nıetterińiz qýantady. Bul rette elimizde túrli salalyq baǵdarlamalar júzege asyp jatqandyǵyn atap ótkim keledi. Olardy júzege asyrýda sizderdiń tájirıbelerińiz kádege jaraıdy dep sanaımyn», - dep atap ótti Tamara Dúısenova.
Aıta keteıik, «Ata joly» kartasy shetelde turyp jatqan etnıkalyq qazaqtarǵa 10 jylǵa deıingi merzimge beriledi. Oǵan qol jetkizý úshin úmitker kelesideı talaptardyń birine saı bolýy shart:
– QR azamattyǵyna qabyldaýdyń ońaılatylǵan tártibi belgilenetin adamdar úshin mamandyǵynyń bolýy;
– Qazaqstanda suranysy joǵary mamandyqqa ıe;
– turaqty turatyn nemese azamattyǵy bar elde tirkelgen, jumys istep turǵan kásibiniń bolýy.
Karta ıesi Qazaqstanda jumysqa ornalasý nemese kásibin júrgizý, áleýmettik tólemder jasaý, kepildendirilgen medıtsınalyq kómekke qol jetkizý, bilim alý jáne t.b. qyzmetterdi paıdalana alady. Alaıda memlekettik qyzmette jumys atqarýǵa, jergilikti ózin-ózi basqarý organdaryna saılanýǵa, respýblıkalyq referendýmǵa qatysýǵa nemese daýys berýge haqy joq.
Joba byltyrdan bastap júzege asyp keledi. Búginge deıin 250 adam 18 memlekettegi elshilikterimizge kelip, keńes alypty. Karta alýǵa «Qutty meken», «E-Qonaq» mobıldi qosymshalary arqyly ótinish berýge bolady nemese Qazaqstannyń shetelderdegi elshilikterine júginý qajet.