Shetelden kólik tasýshylar taýar baǵasyn 53 mln dollarǵa kemitip kórsetkeni anyqtaldy
Memlekettik kirister komıteti turaqty negizde kólik quraldarynyń ımportyn markalary, úlgileri, ákelinetin elderi, baǵa dıapazondary turǵysynan taldaıdy. Azamattarǵa yńǵaıly bolý úshin vedomstvonyń ınternet-resýrstarynda baǵa týraly aqparat jarııalanady.
Sonymen qatar, saıtta kedendik tólemderdiń stavkalaryn qaraýdyń qosymsha múmkindigi bar, bul negizinen azamattarǵa kedendik tólemder somasyn aldyn-ala esepteýge múmkindik beredi.
«Alaıda, birqatar kásipkerler nemese deldaldar kedendik qunyn tómendetip, bıýdjet kirisiniń kólemine tikeleı áser etýde. Bıyl 1 164 kóliktiń quny 300-den 3 000 AQSh dollaryna deıin deklaratsııalanbaq bolǵan.
Birneshe mysaldy qarastyraıyq. Grýzııadan ákelingen 2020 jylǵy Toyota Camry. Syrtqy ekonomıkalyq qyzmetke qatysýshylar kedendik rásimdeý kezinde 1 300-den 17 500 AQSh dollaryna deıingi dıapazondaǵy baǵany málimdegen, ortasha málimdelgen baǵa 11 000 AQSh dollaryn quraıdy. Grýzııadaǵy avtomobılderdi satý saıtynda (autopapa.ge) osyǵan uqsas táýir kólikter 20 000-nan 27 000 AQSh dollaryna deıin baǵalanady. Jaramsyz kólikterdiń quny 12 000-18 000 dollar aralyǵynda», - dep jazdy komıtettegiler.
Vedomstvonyń málimetinshe, olar lıýks kólikteriniń qunyn da tómendetýge tyrysýda: 2021 jylǵy Mercedes Benz AMG G63 - 8 500 dollar, 2021 jylǵy Toyota Land Cruiser 300 - 15 000 dollar, 2021 jylǵy LEXUS RX 450H 4 500 dollar deıńgeıinde baǵasyn kórsetken.
«Barlyǵy 2022 jyldyń birinshi jartyjyldyǵynda kólik quraldarynyń qunyn 53 mıllıon AQSh dollaryna kemitip kórsetkeni anyqtaldy, olardan 6,5 mıllıard teńge qosymsha kedendik bajdar men salyqtar alyndy. Eger avtokólik ıeleri kólikterdi satyp alǵanyn rastaıtyn qujattardy usynsa, onda kedendik rásimdeý deklaratsııada málimdelgen qun boıynsha júzege asyrylady», - dep túsindirdi komıtetten.