Shetelden ákelingen kólikterdi zańdastyrýǵa 6 aı beriledi

ASTANA. QazAqparat – Shetelden ákelingen, zańdastyrylmaǵan kólikterdi memleket usynyp otyrǵan jeńildikti paıdalanyp rásimdep alýǵa 6 aı ýaqyt berilmek. ІІM Ákimshilik polıtsııa komıteti tóraǵasynyń mindetin atqarýshy Qaısar Sultanbaev ortalyq kommýnıkatsııalar qyzmetinde ótken brıfıngide osyndaı málimet aıtty, dep habarlaıdy QazAqparat tilshisi.

Mınıstrlik ókiliniń aıtýynsha, Prezıdenttiń osy máseleni retteý týraly tapsyrmasyn oryndaý úshin Salyq kodeksi men Ekologııalyq kodekske túzetýler engizilgen. Atap aıtsaq, Salyq kodeksindegi túzetý boıynsha, zańdastyrýǵa jatatyn kólikti bastapqy tirkeý úshin tólenetin alym 200 myń teńge etip belgilenbek. Al, Ekologııalyq kodekstegi túzetý boıynsha kádege jaratý tólemi (ýtıldik alym – red.) alyp tastalmaq.

«Іshki ister mınıstrligi shetelden ákelingen kólikterdi zańdastyrýdyń tártibin, merzimi men sharttaryn aıqyndaıtyn Úkimet qaýlysynyń jobasyn daıyndady. Qajetti zańnamalyq ózgerister kúshine enip, tıisti Úkimet qaýlysy qabyldanǵannan keıin zańdastyrý bastalady. Zańdastyrýdy 6 aı ishinde júrgizý josparlanyp otyr», - dedi Ákimshilik polıtsııa komıtetiniń basshysy.

Buǵan deıin Qaısar Sultanbaev memleket usynǵan múmkindikti paıdalanbaı, sheteldik kóligin zańdastyrmaǵan adamdardyń eki-aq joly bar ekenin aıtqan bolatyn. Eske salsaq, sheteldik avtomobılderdi zańdastyrý tártibin belgileıtin Úkimet qaýlysynyń jobasy ázirlengen edi.