Shetelden ákelingen kólikter Interpol bazasy arqyly tekseriledi – ІІM

ASTANA. QazAqparat – Shetelden ákelingen kólikter Interpol bazasy arqyly tekseriledi. Bul týraly Іshki ister mınıstrligi Ákimshilik polıtsııa komıteti tóraǵasynyń mindetin atqarýshy Qaısar Sultanbaev aıtty, dep habarlaıdy QazAqparat tilshisi.

«Kólik ıesi qujattardy tapsyrǵan soń bekitilgen qaǵıda boıynsha onyń tupnusqalyǵy men sáıkestigi tekseriledi: kóliktiń el aýmaǵyna 2022 jylǵy 1 qyrkúıekke deıin ákelingeni, izdeýde bar-joǵy. Kedendik rásimderden ótýi jáne sońǵy tirkelgen jerden esepten shyǵýy anyqtalady. Avtokólikti Qazaqstan aýmaǵyna kirgizý kúni Ulttyq qaýipsizdik komıtetiniń shekara qyzmeti jáne Memlekettik kirister komıtetiniń júıeleri arqyly aıqyndalady», - dedi Qaısar Sultanbaev mınıstrlikte ótken baspasóz máslıhatynda.

Spıkerdiń málimetinshe, joǵaryda atalǵan sátterdi tekserý, anyqtaý protsesi tolyqtaı avtomattandyrylǵan.

«Shekaradan ótken ár kólikke VIN-kod beriledi. Shekara qyzmetinde nemese memlekettik kirister organdarynda kólik quralyn ákelý týraly málimetter bolmaǵan jaǵdaıda onda másele avtosaqtandyrý polısiniń alǵashqy resimdelgen kúni boıynsha anyqtalady. Sondaı-aq elge ákelingen avtokólikter Interpol jáne TMD elderiniń bazalary boıynsha tekseriledi. Odan bólek Eýrazııa ekonomıkalyq odaǵynyń Biryńǵaı kedendik júıesi boıynsha qadaǵalanady», - deıdi mınıstrlik ókili.

Eske salaıyq, elimizde sheteldik kólikterdi zańdastyrý 23 qańtarda bastalady.

Buǵan deıin Q.Sultanbaev mundaı mashınalardy tirkeý úshin qandaı qujattar kerektigin jáne aqshalaı shyǵyn qansha bolatynyn aıtqan edi.