Shetelden ákelingen 475 kólikti zańsyz tirkegen HQO-lar isin tergeý aıaqtaldy

ASTANA. QazAqparat – Shetelden ákelingen 500-ge jýyq kólikti zańsyz tirkegen Mamandandyrylǵan halyqqa qyzmet kórsetý ortalyqtarynyń qyzmetkerleri men polıtseılerge qatysty isti tergeý aıaqtaldy. QazAqparat bul týraly Sybaılas jemqorlyqqa qarsy is-qımyl agenttigine silteme jasap habarlaıdy.

«Antıkorrýptsııalyq qyzmet Astana qalasy boıynsha «Azamattarǵa arnalǵan úkimet» memlekettik korporatsııasy» KEAQ mamandandyrylǵan bóliminiń qyzmetkerleri men azamattyq tulǵalar qatarynan uıymdastyrylǵan topqa qatysty sotqa deıingi tergep-tekserýdi aıaqtady.

Qylmystyq is «Web-Modýl» jáne «IIS TsON» aqparat júıelerinde kólik quraldary týraly málimetterdi zańsyz engizý jáne joıý, mámilelerdiń jazbasha nysandaryn qoldan jasaý faktileri boıynsha tergeldi.

Qylmystyq top 2022 jyldyń qańtar-mamyr aılary aralyǵynda zańnamada qarastyrylǵan alymdar men tólemderdi tólemesten shetelden ákelingen 475 avtokólikti zańsyz tirkedi. Osyǵan baılanysty memleketke 1,4 mlrd teńge kóleminde asa iri kólemde zalal keltirildi.

Barlyǵy 30 adam qylmys jasady dep kúdiktelýde. Olardyń qatarynda Astana qalasy boıynsha № 2 Mamandandyrylǵan halyqqa qyzmet kórsetý ortalyǵynyń basshysy, 4 polıtsııa qyzmetkeri men avtokólikterdi zańsyz rásimdeý boıynsha óz qyzmetterin usynǵan deldaldar bar.

Qazirgi ýaqytta qylmystyq is materıaldarymen tanysý júrip jatyr», - delingen habarlamada.

Antıkor eske salyp ótkendeı, Konstıtýtsııanyń 77-baby 3-tarmaǵynyń 1-tarmaqshasyna jáne Qylmystyq-protsestik kodeksiniń 19-baby 1-bóligine sáıkes, sot úkimi zańdy kúshine engenshe kúdiktiler kinásiz bolyp tabylady. Sondaı-aq azamattardy kólikterdi tirkeý kezinde deldaldardyń qyzmetine júginbeýge shaqyrdy.