Sheteldegi keıbir saılaý ýchaskelerinde bıýlletender jetispedi – Aıbek Smadııarov

ASTANA. QazAqparat – BAQ ókilderiniń qatysýymen ótken brıfıngte Syrtqy ister mınıstrliginiń resmı ókili Aıbek Smadııarov shet elderdegi keıbir saılaý ýchaskelerinde bıýlletender jetispegenin aıtty. Mundaı jaǵdaıǵa shetelge barǵan qazaqstandyqtardyń aldyn ala konsýldyqqa daýys beretinin eskertpegeni sebep boldy, dep habarlaıdy QazAqparat tilshisi.

«Sheteldegi saılaý ýchaskelerinde baıqaýshylar boldy. Elshilikter janyndaǵy saılaý ýchaskelerinde daýys berý protsesi barlyq erejelerge saı ótti. Saılaý ýchaskelerine baqylaýshylarmen qatar, jergilikti BAQ ókilderi de keldi. Bul joly daýys berýge nıettiler kóp boldy. Ásirese, jastar belsendilik tanytty. Tipti keıbir jerlerde bıýlletender jetispedi. Sonymen birge, birneshe saılaý ýchaskesinde 100 paıyz kelý kórsetkishi tirkeldi», - dedi Aıbek Smadııarov.

Onyń aıtýynsha, shetelge shyǵatyn kóptegen qazaqstandyqtar aldyn ala konsýldyqqa daýys beretinin habarlamaǵan. Al shet memleketterdegi saılaý ýchaskeleri bıýlletenderge daýys berý nıetin bildirgenderdiń naqty sanyna baılanysty tapsyrys beredi.

«Kóptegen qazaqstandyqtar shetelge shyǵatyny týraly habarlamaıdy. Olar saılaý ótetinin biledi. Azamattar shetelge shyǵatynyn aldyn ala josparlaıdy, bıletter alady, vıza rásimdeıdi. Alaıda, olar bizge shetelde daýys beretinin habarlamaıdy. Sheteldegi Qazaqstan azamattary men týrısteri saılaý ýchaskelerine kelip, daýys bergisi keletinderin málimdedi. Al olar úshin bıýlletender qarastyrylmaǵan. Mysaly, Antalııada bizdiń azamattarymyz kóp. Alaıda, konsýldyqtyń esebinde tek 22 adam tur», - dep toqtaldy ol.

Aıbek Smadııarovtyń málimdeýinshe, Prezıdent saıaýynda Reseı, Túrkııa jáne Ózbekstan elderindegi qazaqstandyqtar belsendilik tanytqan.