Sheteldegi qazaqtarǵa arnalǵan ınternet-servıs iske qosyldy
«Prezıdent Qasym-Jomart Toqaevtyń tapsyrmasyna sáıkes, Qazaqstan Respýblıkasynan tys jerlerde turatyn qazaqstandyqtardy shoǵyrlandyrý jáne eldiń qoǵamdyq ómirine tartý maqsatynda Syrtqy ister mınıstrligimen birlesip, «Qazálem» atty ınternet-servısti iske qostyq. Jobanyń maqsaty – sheteldegi etnıkalyq qazaqtarǵa, burynǵy otandastarymyzǵa jan-jaqty aqparat berý ǵana emes, olarmen ózara paıdaly jobalar tóńireginde birge jumys isteý. Veb-platforma qazir qazaq, orys, aǵylshyn tilinde iske qosyldy. Frantsýz, qytaı, túrik tilderinde jaqyn arada iske qosylady. Sondaı-aq tóte jáne latyn qarpinde de jumys isteıdi. Osy aýqymdy jobanyń bas operatory bolyp «Otandastar qory» bekitilgen», - dedi Abzal Saparbekuly qor janyndaǵy qoǵamdyq komıssııanyń otyrysynda.
Qor basshysynyń aıtýynsha, shetelde turatyn belgili, daryndy etnıkalyq qazaqtar men otandastardyń bazasyn tolyqtyrý jalǵasýda.
Sonymen birge, QR Úkimetiniń «Sheteldegi etnıkalyq qazaqtardy qoldaý jónindegi 2023-2027 jyldarǵa arnalǵan is-sharalar jospary» qaýlysy ázirlenýde.
«AQSh-ta alǵash ret otandastar forýmyn ótkizý josparda bar. Germanııada kezekti Eýropa qazaqtarynyń quryltaıyn, Máskeý qalasynda Reseı qazaq uıymdary basshylarymen basqosý jáne Monǵolııada Kishi quryltaıdy ótkizý jumystary júrip jatyr. Osy rette sheteldegi basqosýlarda toı-dýman formatynan góri, naqty pikir, usynys, ǵylymı-praktıkalyq formatpen tolyqtyrý dástúri qalyptasýda. Aldaǵy Eýropa qazaqtary quryltaıynda tuńǵysh ret Eýropa qazaq jastarynyń basqosýyn ótkizý jáne olardyń keńesin qurý kózdeledi», - dedi A. Saparbekuly.
Sonymen birge, «Uly dala» kitaptar serııasy sheńberinde sheteldegi etnıkalyq qazaqtardyń buryn-sońdy Qazaqstanda jarııalanbaǵan tyndylaryn jınap, bıyl 10 kitabyn basyp shyǵarý jobasy bastalyp ketti.