Sheteldegi qazaqsha BAQ ókilderi Memleket basshysynyń Alǵys hatymen marapattaldy

ASTANA. QazAqparat - 28 maýsym – buqaralyq aqparat quraldary qyzmetkerleriniń kásibı merekesi. Aıtýly kúnge oraı QR Prezıdenti Qasym-Jomart Toqaev shetelde qazaq tilinde aqparat taratyp júrgen BAQ ókilderin arnaıy alǵys hatpen marapattady, dep habarlaıdy QazAqparat «Otandastar» qoryna silteme jasap.

Alǵys hatta «Shetelde qazaq tilindegi buqaralyq aqparat quralyn damytýǵa jáne qandastarymyzdyń ana tili men ulttyq bolmysyn saqtaýyna eleýli úles qosqanyna alǵys bildiremin!» delingen.

Osy oraıda Otandastar qory sheteldegi BAQ ókilderimen tyǵyz baılanysta ekenin atap ótý kerek.

Sheteldegi qazaq tilindegi aqparat quraldary men onyń demeýshi janashyrlary, jýrnalısteri ana tiliniń saqtalýy, ana tilinde aqparat alý, ulttyq qundylyqtardy dáripteý úshin kóptegen qıyndyqtarǵa qaramastan aıanbaı eńbek etip keledi.

Alǵys hat ıegerleri:

Ertolqyn Gaınetýlla – Kazakh Eli jýrnalynyń shyǵarýshysy jáne bas redaktory (Ystanbul qalasy, Túrkııa)

«Omby qazaqtary» gazetiniń ujymy – (Omby qalasy, RF)

Arqalyq Sultanov – «Şýskıe zorı» gazetiniń «Shúıdiń nury» qazaq qosymshasynyń redaktory (Qosaǵash aýdany Altaı Respýblıkasy, RF)

Gúldana Narynbetova – «Kenımeh tańy» gazetiniń bas redaktory (Kenımeh aýdany, Naýaı oblysy, Ózbekstan)

Ǵulamzákir ıÝsýpov – «Nurly jol» gazetiniń bas redaktory jáne ardager-jýrnalıst (Ózbekstan)

Ómirbek Habaıuly – Kaznews.mn portalynyń bas redaktory (Ulan-Batyr qalasy, Mońǵolııa)

Gaýhar Omarhanova – Irandaǵy «Qazaq radıosynyń» redaktory (Iran).