Sheteldegi qazaq balalaryna arnalǵan jazǵy lager ashyldy
«Otandastar qorynyń» baspasóz qyzmetinen habarlaǵandaı, lager Aqmola oblysy Býrabaı aýdany Şýche kóliniń ońtústik shyǵys jaǵalaýynda ornalasqan «IQanat High School of Burabay» mektebiniń bazasynda uıymdastyrylǵan.
«Qazaqtyń uly aqyny Abaı Qunanbaıulynyń tujyrymdamasyna saı talap, eńbek, tereń oı, qanaǵat, raqym qundylyqtaryna negizdelgen bul lagerge Frantsııa, Túrkııa, Iran, Qyrǵyzstan, Qytaı, Mońǵolııa, Ózbekstan, Reseıden 84 qazaq balasy kelip qatysýda. Sonymen qatar, qazaqtyń ulttyq bolmysy, salt-dástúr, óneri men zamanaýı bilim, ǵylym tendentsııalaryn onyń ishinde STEM, robototehnıka, kásipkerlik, jobalardy basqarý daǵdylary ushtastyrǵan», - delingen baspasóz baıanynda.
Ashylý saltanatynda «Otandastar qorynyń» prezıdenti Abzal Saparbekuly qatysýshylardy Balalar jylymen quttyqtap, Atajurtqa kelip alańsyz boı sergitip, oı jınaqtap, tamasha demalys ótkizýine tilektes ekenin jetkizgen.
«Ár elden kelip, túrli tilderde sóılep ósken jasóspirimder jınala qalsa, birin biri tek qazaq tilinde sóılegende ǵana túsine alady. Osylaısha tájirıbe jınap qazaq tiline degen qushtarlyqtary oıanýda» deıdi qoǵam prezıdenti.
Sheteldegi qazaq balalaryna arnalǵan jazǵy lagerler 2019 jyly bastaý alǵan edi.
Sol jyly 5 túrli baǵytta jazǵy demalys uıymdastyrylyp, 600-ge jýyq sheteldegi qazaq balasy Qazaqstanǵa kelgen bolatyn.
Eki jyl pandemııa kesirinen uıymdastyrylmaǵan bul shara bıyldan bastap qaıta júzege asa bastady.