«Sheteldegi qazaq balalary» jobasy Jibek Joly telearnasynda qaıta jaryq kóredi

ASTANA. QazAqparat – Belgili jýrnalıst Janar Baısemizovanyń «Sheteldegi qazaq balalary» atty avtorlyq baǵdarlamasy Jibek Joly arnasynda qaıta jandandy, dep habarlaıdy QazAqparat tilshisi.

Sheteldikter asyrap alyp, týǵan Otanynan jyraqqa ketken qazaqstandyqtardyń taǵdyryn baıandaıtyn «Sheteldegi qazaq balalary» baǵdarlamasy araǵa 9 jyl salyp, qaıtadan kógildir ekranǵa shyqty. Naqtyraq aıtsaq, Jibek Joly arnasy avtorlyq telejobany jańa formatta usynyp otyr. Jýyrda ǵana jobaǵa jaýapty top qaıta jandanǵan baǵdarlama úshin Eýropada túsirilim jasap qaıtty.

«Fılm barysynda Erlan (Germanııaǵa ketken – red.) men Sarıtany (Belgııaǵa ketken - red.) osymen úshinshi ret túsirdim. Demek, jobanyń arqasynda bizden bala asyrap alǵan sheteldikter, halyqaralyq agenttikter qamqorlyǵyndaǵy balalarǵa memlekettik organdar tarapynan ǵana emes, Qazaqstan qoǵamynyń tarapynan da alańdaýshylyq bar ekenin, ol balalardyń joqtaýshysy bar ekenin uqty dep oılaımyn. Mysaly, Erlan osy joly barǵanda nemis ákesine áńgime arasynda «Kórdiń be, áke, biz qazaqtar osyndaı halyqpyz» dep maqtanyp jatyr. Osyndaı sátterde jyldar boıǵy tyrashtanǵan eńbektiń bosqa ketpegenine sene túsemin», - deıdi joba avtory Janar Baısemizova.

Ispandyq azamattar asyrap alǵan Salamanka Garsıa Lýıs - Aqylbek, Florıan Markos - Dıas, Marııa Valentına Panedas Sıman (qazaqsha esimi – Gúlim) búginde ıspan otbasynda ósip jatyr. Baǵdarlama Jibek Joly arnasynyń efırinen aptanyń ár jeksenbisinde kórsetiledi.

«Sheteldegi qazaq balalary» jobasyn, osy jeksenbi 2 qazan kúni, saǵat 14:30-da Jibek Joly arnasynan kórińizder!