Sheteldegi qandastarymyz Qazaq radıosyn onlaın rejımde tyńdaı alady

ASTANA. QazAqparat - Búgin QR Aqparat jáne kommýnıkatsııalar mınıstri Dáýren Abaev xalyq aldynda esep berip, birqatar mańyzdy suraqtarǵa jaýap berdi. Sonyń ishinde sheteldegi qandastarymyzǵa Qazaq pen Shalqar radıolaryn jetkizý máselesi de bar, dep xabarlaıdy QazAqparat tilshisi.

"Qazirgi kezde sheteldegi qandastarymyzǵa Qazaq radıosyn jetkizýdiń bir-aq joly bar. Ol - radıo jelini onlaın rejımge kóshirý. Biz osy salada arnaıy jobany iske asyramyz. Sonda sheteldegi qandastarymyz úshin Qazaq radıosy men Shalqar radıosyn onlaın rejımde tyńdaýǵa múmkindik beremiz", - deıdi Abaev.

Mınıstrdiń aıtýynsha, qazirgi kezde Qazaqstannyń ózinde keıbir shalǵaı aýdandarda radıo ustamaıdy. "Almaty, Ońtústik Qazaqstan, Soltústik Qazaqstan, Aqtóbe oblystarynyń keıbir aýdandarynda radıolar tolqyny durys tartpaıdy. Sondyqtan osy jyldyń aıaǵyna deıin Almaty men Oństústik Qazaqstan oblystarynyń máselesin sheshemiz dep oılaımyn", - dedi Dáýren Áskerbekuly.