Sheteldegi qandastar týraly tyń málimetti qamtyǵan tarıhı kitaptyń tusaýy kesildi
Tusaýkeserge respýblıkanyń ár túkpirinen tarıhshy, ǵalym, aqyn-jazýshylar qatysyp, túrli baıandama jasady.
Sondaı-aq atalǵan sharaǵa Shvetsııa, Frantsııa, Túrkııa, Qytaı elderinde turatyn qandastarymyz da onlaın qatysyp, ózderiniń júrekjardy lebizin bildirip, sálem joldady.
Keshke jınalǵan kópshilik qazir umyt bola bastaǵan baıyrǵy qazaqtyń qıssa-dastan oqý mánerine kýá boldy.
Atalmysh kitapqa tarıhshy, ǵalym Jambyl Artyqbaev, Serik Mustafauly, Qajymurat Tólegenuly, jazýshy Ápetaı Muqarapuly, Jádı Shákenuly syndy qalamgerlerdiń ǵylymı maqalalary, zertteý eńbekteri engen.
Kesh sońy ásem án men tátti kúıge kezek berip, kontserttik baǵdarlamaǵa ulasty.
Aıta keteıik, atalǵan kitapta álemniń ár túkpirinde tarydaı shashylǵan qandastarymyz týraly sony málimetter aıtylǵan.
Osyndaı derekterdiń biri qazaqtyń ekinshi Beıbarys sultany atanǵan Abdolla qajy Saryuly Ál-Buqarı týraly jazylǵan.
Abdollanyń óz esimi - Sháken Saryuly. 1927 jyly Qytaıdaǵy ór Altaıdyń Shińgil aýdanynda týǵan.
1940 jyly qazaqty qynadaı qyrǵan Mafýfańnyń talaýyna túsip, 13 jasynda týǵan elinen aıyrylyp, saýdager uıǵyrǵa satylyp ketken.
1941 jyly sol uıǵyrmen birge Saýd Arabııasyna baryp, sonda qalǵan. 1942 jyldan bastap Mekke qalasyndaǵy jetim balalar úıinde tárbıelengen.
1946 jyly Mekke qalasyndaǵy Memlekettik áskerı ýnıversıtetke qabyldanady.
Keıin shekara qorǵanys armııasynda, shekara qorǵanysynyń esirtkimen kúres bóliminde mańyzdy qyzmette bolady.
Ótken ǵasyrdyń 70-jyldary Mekke qalasynyń ákimi mindetin 10 jylǵa taıaý atqarǵannan keıin Saýd patshasynyń kómekshisi, ýáziri qyzmetine deıin kóterilgen.
Sonymen birge túrki, qazaq jurtyna tanymal qajylardyń qamqory, Mońǵolııadaǵy Baıanólgeı ortalyq meshitin saldyrǵan ultshyl azamat.
Sháken qajy Saryuly 2000 jyly Saýd Arabııasynyń Jıdda qalasynda 73 jasynda dúnıeden ótti.