Sheteldegi qandastar «Qaıyrymdy ister marafonyna» qatysa alady
Tilshiler suraǵyna jaýap bere otyryp, spıker «Qaıyrymdy ister marafonyna» shet elderdegi etnıkalyq qazaqtar da jáne shetelde turatyn jáne jumys isteıtin qazaqstandyqtar da qosyla alatynyn atap ótti.
«Árıne, Qazaqstan Respýblıkasynan tys jerlerde turatyn otandastarymyz marafonǵa qatysýy kerek, eshqandaı aýmaqtyq shekteýler joq. Marafondy uıymdastyrýshylardyń aldyna qoıǵan jahandyq maqsattarynyń biri – marafonǵa qazaqstandyqtardy ǵana emes, basqa elderdiń ókilderin de tartý bolatyn. Sondyqtan biz otandastarymyz, qandastarymyz kóteretin bastamalardy qýana qabyldaımyz. Sonymen qatar, biz «Otandastar» qorymen ózara kelisim bekittik, bul qor sheteldegi bizdiń áriptesimiz jáne osy bastamalardyń úılestirýshisi bola alady dep úmittenemiz», - dedi L. Dıas Ortalyq kommýnıkatsııalar qyzmetinde ótken baspasóz máslıhatynda.
Sonymen birge, QR Aqparat jáne qoǵamdyq damý mınıstrligi Azamattyq qoǵam isteri komıtetiniń tóraǵasy Madııar Qojahmet «Qaıyrymdy ister marafonynyń» aldaǵy jyldary da jalǵasatynyn aıtty.
«Qaıyrymdy ister marafony ári qaraı jalǵasa beredi. Ótken jyldan bastap, bul sharalar tek qana halyqtyń arasynda emes, memlekettik jáne ulttyq deńgeıde qoldaý taýyp, qazirgi tańda iske asyrylyp jatyr. Oǵan arnaıy uıymdastyrýshylyq kómekter jasalyp jatyr. Bul jumystyń nátıjeligin ótken jyly kórdik, bıyl da mysaly qystyń qıyn kezeńinde volonterler bir-birine kómektesip jatqan kezde kórip jatyrmyz. Sondyqtan, bul marafonnyń ári qaraı jalǵasýy sózsiz. Sonymen birge, baıandamamda aıtyp ketkendeı, Memleket basshysy BUU aıasynda volonterlik bastamalardy ulttyq deńgeıde ǵana emes, halyqaralyq deńgeıge kóterip, aldaǵy jyldardyń birin Volonterlerdi jumyldyrýdyń halyqaralyq jyly dep jarııalaý bastamasyn kóterdi. Sondyqtan osyndaı sharalar men bastamalardy óz elimizdiń aıasynda emes, halyqaralyq deńgeıde iske asýy da bul jyldyń jarııalanýyna septigin tıgizedi. Bul jumysty óz tarapymyzdan jalǵastyryp, barsha adamdardy osy sharaǵa qatysýǵa shaqyramyz», - dep jaýap berdi M. Qojahmet tilshi suraǵyna.
Esterińizge sala keteıik, Qazaqstan Táýelsizdiginiń 30 jyldyǵy aıasynda Memleket basshysynyń bastamasymen «Qaıyrymdy ister marafony» jalpyulttyq jobasy bastaý aldy. Marafonǵa qatysýǵa barlyq qazaqstandyqtar, sonyń ishinde memlekettik jáne qoǵamdyq uıymdar, bıznes jáne JOO ókilderi shaqyryldy.
Jobanyń úılestirýshisi – Azamattyq bastamalardy qoldaý ortalyǵy. Uıymdastyrý suraqtary boıynsha 8 (7172) 221224 nómirine habarlasýǵa bolady, e-mail: dobryhdelmarafon@gmail.com.