Sheteldegi etnıkalyq qazaqtar tótenshe jaǵdaıǵa tap bolsa, olardy Qazaqstanǵa qabyldaýdyń tetigi bolýy tıis - A. Smaıyl

ASTANA. QazAqparat - Sheteldegi etnıkalyq qazaqtar tótenshe jaǵdaıǵa tap bolsa, olardy Qazaqstanǵa qabyldaýdyń tetigi zańda qamtylýy tıis. Bul týraly búgin Májiliste depýtat Aldan Smaıyl osyndaı usynys aıtty. Eske salaıyq, Májiliste «QR keıbir zańnamalyq aktilerine halyqtyń kóshi-qony jáne jumyspen qamtylý máseleleri boıynsha ózgerister men tolyqtyrýlar engizý týraly» zań jobasynyń tanystyrylymy ótken edi.

«Qazaqtar tyǵyz ornalasyp, turyp jatqan shet elderde ekonomıkalyq daǵdarys bolsa, kúnkóris ábden tómendep, qandastarymyzdyń turmys-tirshiligine qaýip tónse nemese tabıǵı apattar oryn alsa, etnıkaaralyq qaqtyǵystar oryn alsa qalaı bolady? Mundaı jaǵdaıda etnıkalyq qazaqtar ózderiniń tarıhı Otany Qazaqstanǵa aǵylýy ábden múmkin. Olardyń barar basqa jeri joq. «Jaman aıtpaı jaqsy joq», osyndaı jaǵdaı týsa biz etnıkalyq qazaqtardy qalaı qabyldaımyz? Olarǵa «aldymen oralman mártebesin alýyń kerek» dep keýdesinen keri ıteremiz be? Joq álde olardy tutastaı qabyldaýǵa Qazaqstannyń tártibi bola ma? Osyny zań jobasynda qarastyrýǵa tıispiz», - dedi Aldan Smaıyl. Onyń aıtýynsha, shetelde turyp jatqan qazaqtardyń basyna kún týsa olardy Qazaqstanda qabyldaýdyń júıesi zań arqyly kórinis tabýy shart.

Óz kezeginde Densaýlyq saqtaý jáne áleýmettik damý vıtse-mınıstri Dáýlet Arǵyndyqov zań jobasymen jumys barysynda atalǵan máseleni qarastyrýǵa bolatynyn atap ótti.