Sheteldegi zańdy jumys: Ońtústik Koreıa qandaı talaptar qoıyp otyr
«Mınıstrlik Koreıa Respýblıkasynda qazaqstandyq jumysshylardyń quqyqtaryn qorǵaý aıasynda Qazaqstandy Koreıa Respýblıkasyndaǵy Employment Permit System (EPS) júıesine engizý jumystary atqarylyp jatyr. EPS júıesi óz jumysyn 2004 jyldyń 1 tamyzynda bastady jáne qazirge deıin bul júıe boıynsha 16 eldiń azamaty Ońtústik Koreıada jumys isteı alady», - delingen Eńbek mınıstrliginiń Kazinform agenttigine bergen jaýabynda.
Aıta keteıik, bul júıedegi jumys qyzmet kórsetý, óndiris, qurylys, aýyl sharýashylyǵy jáne balyq aýlaý salalarynda usynylady. EPS júıesi sheteldikke Ońtústik Koreıada 3 jylǵa deıin jumys isteýge múmkindik beredi, sondaı-aq jumysshylarmen kelisimshart uzartylýy múmkin. Bul óz kezeginde azamattarǵa osy elde 4 jyl 10 aıǵa deıin turýǵa múmkindik beredi. EPS júıesine qatysý úshin Koreıa jaǵy EPS daıyndyq ortalyqtaryna barýdy talap etedi. Bul ortalyqtarda Ońtústik Koreıada jumysqa ornalasqysy keletinder tildi úırený kýrstarynan, kóshi-qoni jáne medıtsınalyq máselelerge qatysty testileýden ótedi.
«Qazaqstan azamattary medıtsınalyq tekserýden, tildi meńgerý oqýynan jáne kóshpeli daıarlyqtan ótýi úshin Koreıa Respýblıkasy Almaty jáne Almaty oblysynyń Qonaev qalalarynda EPS ortalyǵyn ashýǵa kelisimin berdi», - dep atalyp ótken mınıstrlik aqparatynda.
Koreıa Respýblıkasynyń zańnamasyna sáıkes, sheteldi Ońtústik Koreıanyń EPS júıesine qosý máselesi úsh kezeńde júzege asyrylady: - memleketishilik kelisý;
- EPS ortalyǵyn ashýǵa arnalǵan obektilermen tanysý;
- Koreıa Respýblıkasynyń vedomstvoaralyq komıssııasynda Qazaqstandy EPS júıesine qosý týraly túpkilikti sheshim qabyldaý.
Qazirgi kezde eldi EPS júıesine qosý máselesi Koreıa Respýblıkasynyń jaýapty memlekettik organdarymen memleketishilik kelisý satysynda tur. Koreı tarapy Qazaqstandy EPS júıesine qosý úshin tıisti úsh shartty qoıdy. Birinshiden, Koreıa Respýblıkasynyń kóshi-qon zańnamasyn buzýǵa jol bermeý jónindegi mindettemeni qabyldaý kerek. Ekinshiden, Qazaqstannyń Koreıa Respýblıkasyndaǵy Elshiligi janyndaǵy «Eńbek kóshi-qony jónindegi attashe» jeke laýazymyn engizý qajet. Úshinshiden, buryn Ońtústik Koreıada zańsyz bolǵan jáne kóshi-qon zańnamasyn buzǵan Qazaqstan azamattarynyń Koreıa Respýblıkasyna qaıta kelmeýi jóninde sharalar qabyldaý.
Bul turǵyda osy talaptardy QR Eńbek jáne halyqty áleýmettik qorǵaý mınıstriligi tıisti memlekettik organdarmen birlesip pysyqtap jatyr.
Osyǵan deıin Eńbek jáne halyqty áleýmettik qorǵaý mınıstri Svetlana Jaqypova Ońtústik Koreıada 15 myń Qazaqstan azamaty zańsyz júrgenin aıtqan edi.
Sonymen qatar vedomstvo basshysy Qazaqstan azamattarynyń zańdy túrde jumys isteýine qatysty is-sharalar jyl sońyna deıin aıaqtalýy múmkin ekenin málim etti.