Sheteldegi Qazaqstan azamattarynyń tólqujatyn resimdeý jeńildedi

<p>Shetelde qujattardy tirkeý, konsýldyq esepke qoıý qyzmetteri avtomattandyryldy. Bul týraly Syrtqy ister mınıstrliginiń resmı ókili Aıbek Smadııarov aıtty, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

«Qazaqstannyń Syrtqy ister mınıstrligi halyqqa qyzmet kórsetýdiń sapasyn arttyrý úshin memlekettik qyzmetterdi avtomattandyrý jáne ońtaılandyrý boıynsha birqatar shara qabyldady. Qazaqstan azamattaryna memlekettik qyzmetterdi alý barynsha yńǵaıly bolý úshin qazir elimizdiń shet memletterdegi mekemelerinde «egov.kz» portal arqyly kórsetiletin 17 qyzmettiń 10-y iske qosyldy. Shetelde azamattyq hal aktilerin tirkeý, jekelegen sanattaǵy elektrondyq vızalardy berý, konsýldyq esepke qoıý jáne alý, shetelde ETsQ alý, sondaı-aq Qazaqstandaǵy sheteldik ınvestorlyq qyzmetpen baılanysty elektrondyq ótinish berý protsesi avtomattandyryldy. Azamattardyń suranystaryn qarastyrý ýaqytyn qysqartý maqsatynda memlekettik aqparattyq júıeler belsendi qoldanylady. Bul shara sheteldegi Qazaqstan azamattarynyń pasporttaryn resimdeý merzimin, Qazaqstan azamattyǵyn, otbasylyq jaǵdaıyn jáne basqa da suranystardy rastaýdy 3 aıdan 1,5 aıǵa deıin qysqartýǵa múmkindik berdi. «Vmp.gov.kz» vızalyq-kóshi-qon portaly arqyly elge oralýǵa arnalǵan kýálikti resimdeý protsesin avtomattandyrý boıynsha jumys júrgizilip jatyr», - dedi A. Smadııarov vedomstvoda ótken baspasóz máslıhatynda.

Onyń aıtýynsha, Qazaqstannyń shet eldegi 66 mekemesinde Qazaqstan azamattaryna yńǵaıly bolý úshin ETsQ berý jáne «elektrondyq úkimet» portalynyń barlyq qyzmetterine qol jetkizý júzege asyrylady. Qazir osy qyzmetke qosymsha 22 konsýldyq mekemeni qosý boıynsha jumys jalǵasyp jatyr. «Ulttyq Aqparattyq Tehnologııalar» AQ-men birlesip konsýldyqtarǵa barýdy josparlaý jáne uzyn-sonar kezekti boldyrmaý úshin onlaın-brondaý servısteri ázirlendi. Bul servıs elimizdiń shet eldegi 84 mekemesinde jumys isteıdi.

«Sonymen qatar «egov.kz» portalynda konsýldyq qyzmetter bólimi qurylyp, bul elektrondyq túrde qyzmet kórsetýge (ótinimderdi jiberýge), kez kelgen kezeńde ótinimdi óńdeýdi baqylaýǵa múmkindik beredi. Azamattardyń ótinishterin «e-Ótinish» portaly arqyly tikeleı sheteldegi mekemelerde qaraýǵa múmkindik berildi. Bul ótinish berýshilerge jaýap daıyndaý ýaqytyn qysqartady. Qazir portalǵa 31 sheteldik mekeme qosylǵan. Bıylǵy qazan aıynyń sońyna qaraı barlyq qalǵan sheteldik mekemelerdi qosý josparlanǵan», - dedi resmı ókil.