Shetelde júrip Qazaqstan pasportyn alatyn azamattar tizimi keńeıtilmek

ASTANA. QazAqparat – QR Syrtqy ister mınıstrligi «Qujattardy qabyldaý jáne olardy Qazaqstan Respýblıkasynyń shet elderde júrgen azamattaryna pasporttar jasaýǵa jiberý» memlekettik qyzmeti qaǵıdasyna ózgerister ázirledi, dep habarlaıdy QazAqparat tilshisi.

Ashyq NQA portalynda jarııalanǵan buıryq jobasyna qaraǵanda, búginde Qazaqstannyń shet elderdegi mekemeleri bul qyzmetti Qazaqstan Respýblıkasynan tys jerdelerde turaqty turatyn; shet memleketterdiń aýmaǵynda ornalasqan oqý oryndarynda kúndizgi oqytý nysany boıynsha bilim alatyn; shet memleketterde eńbek sharty boıynsha jumys isteıtin; kórsetilgen adamdarmen birge turatyn otbasy múshelerine; sheteldegi dıplomatııalyq qyzmet personalymen birge turatyn dıplomatııalyq qyzmet personalynyń týystaryna; jasynyń egde tartýyna baılanysty ózine-ózi kútim jasaýǵa qabiletsiz adamdarǵa (qarttar) jáne tynys-tirshiligin shekteıtin turaqty aǵza fýnktsııalarynyń aýytqýlarymen densaýlyǵynda buzýshylyq bar adamdarǵa kórsetedi.

Endi Elshilikter myna sanattaǵy azamattarǵa da qyzmet kórsetetin bolady:

Qazaqstan Respýblıkasynan tys jerlerde týǵan jaǵdaıda kámeletke tolmaǵandarǵa;

Qazaqstan Respýblıkasynan tys jerlerde turatyn sheteldiktiń otbasy músheleri bolyp tabylatyndarǵa;

ózine-ózi qyzmet kórsete almaıtyn jaqyn týystaryn kútýdi júzege asyratyn adamdarǵa;

shet memlekettiń aýmaǵynda ustalǵandarǵa nemese kúzetpen ustalatyndarǵa, qamaýǵa alynatyndarǵa, sondaı-aq penıtentsıarlyq mekemelerde jazasyn óteýshilerge.

Buıryq jobasy 22 qarashaǵa deıin ashyq talqylaýda bolady.