Shetelde júrgen 8 myńnan astam Qazaqstan azamaty óz tańdaýyn jasady
«Qazaqstannyń sheteldegi mekemeleri janynan 64 saılaý ýchaskesi quryldy. Sheteldegi mekemeler janyndaǵy saılaý ýchaskeleri týraly aqparattar mekenjaıy, baılanys málimetteri kórsetile otyryp, mınıstrliktiń jáne Ortalyq saılaý komıssııasynyń veb-saıttarynda sheteldegi mekemelerdiń ınternet resýrstarynda, dıplomatııalyq ókildikterdiń áleýmettik jelilerdegi paraqshalaryna ornalastyryldy», - dedi mınıstrdiń orynbasary Ortalyq saılaý komıssııasynda ótken brıfıng barysynda.
Onyń atap ótýinshe, shetelge jeke shaqyrýmen, qyzmetti, iskerlik saparmen jáne týrıst retinde barǵan Qazaqstan azamattary ulttyq tólqujatyn kórsetken jaǵdaıda, saılaýshylar tizimine engiziledi.
«Bıylǵy 9 maýsymdaǵy derekterge sáıkes sheteldegi saılaýshylar tizimine 15 349 azamatymyz tirkelgen. Shetelde daýys berý tynysh ótip jatyr. 12 ýchaskede Qazaqstannyń qoǵamdyq birlestikteri men kommertsııalyq uıymdarynan jáne TMD mıssııasynan 35 baıqaýshy qatysyp jatyr. Nur-Sultan qalasynyń ýaqytymen saǵat 19-00-de shetelde 8322 azamatymyz daýys berdi. Bul sheteldegi tizimge engen saılaýshylardyń 54,2 paıyzyn quraıdy», - dedi R.Vasılenko.
Sonymen qatar vıtse-mınıstr saılaý ýchaskesi joq shet memlekette júrgen azamattarymyzǵa kórshiles elderde ashylǵan saılaý ýchaskesine baryp daýys berýge keńes berdi. Sheteldegi saılaý ýchaskeleri jergilikti ýaqyt boıynsha tańerteńgi 07-00-den 08-00-ge deıin jumys isteıtindigin eskertti.
«Ýaqyt aıyrmashylyǵyna baılanysty Azııada ornalasqan saılaý ýchaskeleri jumystaryn aıaqtap, daýystardy sanaýǵa kiristi. Nur-Sultan ýaqytymen 17-00-de Vashıngton, Nıý-Iork jáne Ottavadaǵy saılaý ýchaskeleri sońǵy bolyp ashyldy. Daýys berý qorytyndysy shyǵarylǵannan keıin túpnusqa qujattar Esil aýdandyq saılaý komıssııasyna der ýaqytynda jetkizilýi úshin jedel Syrtqy ister mınıstrligine tapsyrylatyn bolady», - dedi ol.