Shetelde júrgen 7 myńnan astam Qazaqstan azamaty daýys berip úlgerdi

ASTANA. QazAqparat – Qazaqstannyń shet elderdegi mekemeleri janynan ashylǵan 10 ýchaske jumysyn aıaqtady. Bul týraly QR Syrtqy ister mınıstriniń orynbasary Roman Vasılenko aıtty, dep habarlaıdy QazAqparat tilshisi.

«Eldegi eń mańyzdy saıası sharalardyń biri – kezekten tys prezıdent saılaýy aıaqtalýǵa jaqyn. Elimiz álemdik qoǵamdastyqtyń jaýapty múshesi retinde ulttyq zańnamaǵa jáne halyqaralyq standarttarǵa sáıkes saılaý ótkizýge múddeli. Jalpy, Qazaqstandaǵy prezıdent saılaýyn baqylaýǵa kóptegen sheteldik baıqaýshylardyń qyzyǵýshylyq tanytyp, belsendi qatysyp jatqanyn atap ótkim keledi. 10 halyqaralyq uıym men 35 shet memleketten akkredıttelgen sheteldik baıqaýshylardyń jalpy sany 641 adamdy qurady», - dedi ol Ortalyq saılaý komıssııasynda ótken brıfıngte.

Mınıstr orynbasarynyń dereginshe, saılaýǵa 264 sheteldik jýrnalıst qatysyp jatyr.

«Sheteldegi azamattarymyzdyń konstıtýtsııalyq quqyǵyn qamtamasyz etý maqsatynda Qazaqstannyń shet elderdegi mekemeleri janynan 53 memlekette 68 ýchaskelik saılaý komıssııasy qurylǵan bolatyn. Daýys beretin saılaýshylardyń jalpy sany – 12 841. 19.00-degi jaǵdaı boıynsha Japonııa, Koreıa, Qytaı, Sıngapýr, Malaızııa, Taıland, Indonezııa syndy elderdegi 10 ýchaskeniń jumysy aıaqtalyp, shamamen 7 400 adam daýys berdi. Bul - tirkelgen saılaýshylardyń 57,5 paıyzy. 57 saılaý ýchaskesi áli óz jumysyn jalǵastyryp jatyr. Bir ýchaske áli ashylǵan da joq. Ol - San-Frantsısko qalasyndaǵy ýchaske», - dedi Roman Vasılenko.