Shetelde jumys istep jatqan qazaqstandyqtardyń naqty esebi joq - Tamara Dúısenova

ASTANA. QazAqparat – Qansha qazaqstandyqtyń syrt elde eńbektenip jatqany belgisiz. Onyń sebebin Eńbek jáne halyqty áleýmettik qorǵaý mınıstri Tamara Dúısenova túsindirip ótti, dep habarlaıdy QazAqparat tilshisi.

«Shetelge jumys isteýge ketip jatqan azamattarǵa qatysty biryńǵaı esep júıesi joq. Sondyqtan da, eshqandaı organ qansha qazaqstandyqtyń shetelde eńbektenip jatqany týraly naqty derekti usyna almaıdy. Shetel asqan jerlesterimiz ártúrli sebepti kórsetedi. Bireý oqýǵa bara jatsa, ekinshisi otbasylyq jaǵdaımen shetelge shyǵyp jatqanyn aıtady. Al odan ári ol azamattar jumys taýyp, sonda qalýy múmkin. Osy oraıda, biz Syrtqy ister mınıstrligimen birlesip shetelde eńbek etip jatqan qazaqstandyqtardyń esebin anyqtaý jumysyn qolǵa aldyq», - dedi Tamara Dúısenova OKQ–de ótken baspasóz máslıhatynda.

Mınıstrdiń túsindirýinshe, syrtta eńbek etip júrgen otandastarymyz týraly málimet naqtylanǵannan keıin sol elderdiń quzyrly organdarymen baılanys ornatylady.

Aıta keteıik, Úkimet basshysy Álıhan Smaıylov shetelde jumys isteıtin qazaqstandyqtardyń quqyǵyn qorǵaý boıynsha tapsyrma bergen edi.

Premer-Mınıstr Birikken Arab Ámirlikterimen jáne Ońtústik Koreıamen qazaqstandyq jumyskerlerdiń quqyqtaryn qorǵaý jóninde kelisimge qol jetkizilmeı otyrǵanyna birneshe jyl bolǵandyǵyn basa aıtty.

«Osy jumysty aıaqtaý úshin Syrtqy ister mınıstrligimen birlese shuǵyl is-sharalardy qabyldaý kerek», - dedi Álıhan Smaıylov.