Shetelde jumys isteıtin qazaqstandyqtardyń quqyǵyn qorǵaıtyn kelisimder bekitiledi

<p>ASTANA. KAZINFORM &ndash; Qazaqstan basqa elderde jumys isteıtin otandastardyń eńbek jáne áleýmettik quqyqtaryn qamtamasyz etý boıynsha 8 úkimetaralyq kelisim bekitedi. Bul týraly QR Eńbek jáne halyqty áleýmettik qorǵaý mınıstri Svetlana Jaqypova aıtyp berdi.&nbsp;</p>

Mınıstr buǵan deıin eńbek kóshi-qony salasynda shetelde jumys isteıtin qazaqstandyqtardyń quqyqtaryn qorǵaý máselesi esh qarastyrylmaǵanyn atap ótti. 

«Zańsyz kóshi-qonnyń kóbeıýi jáne otandastarymyzdyń quqyqtarynyń buzylýy olardyń eńbek quqyqtaryn qorǵaýdyń tıimdi tetigin engizýdi talap etedi. Búginde basqa elderde jumys isteıtin qazaqstandyqtardyń eńbek jáne áleýmettik quqyqtaryn qamtamasyz etýge qatysty 8 jańa úkimetaralyq kelisimge qol qoıý jumystary júrgizilýde», – dedi S. Jaqypova mınıstrliktiń alqa otyrysynda.

 Mınıstrdiń aıtýynsha, Qazaqstandy Ońtústik Koreıanyń jumysqa ornalasýǵa ruqsat berý júıesine (EPS) engizý boıynsha tıisti sharalar qabyldandy.

«Sondaı-aq, biz Qazaqstan azamattarynyń shetelde zańdy eńbek qyzmetin uıymdastyrý úshin jeke jumyspen qamtý agenttikterimen ózara is-qımyldy qamtamasyz etýdi josparlap otyrmyz», – dedi Eńbek mınıstri.

 Buǵan deıin Svetlana Jaqypova Qazaqstanda kóshi-qon protsesteri tsıfrlandyrylatynyn aıtqan edi.