Shetelde turatyn 300-ge jýyq qazaq balasy demalý úshin Býrabaıǵa keldi
«Týǵan jer – altyn besik» taqyrybymen ashylǵan halyqaralyq balalar quryltaıyna Reseı, Qytaı, Ózbekstan, Qyrǵyzstan sııaqty kórshi memleketterdegi qazaq dıasporalarynan barlyǵy 288 bala kelgen. Demalýshylardyń deni - óz ortasynda oqý ozaty jáne túrli daryn ıesi.
Aýysymnyń ashylýynda sóz sóılegen Aqparat jáne qoǵamdyq damý vıtse-mınıstri Marat Ázilhanov sheteldegi qazaq balalarynyń Qazaqstanǵa kelip, demalýyna jáne ana tilin úırenýine barlyq jaǵdaı jasalyp jatqanyn atap ótti.
«Bıyl osymen onynshy jyl qatarynan «Baldáýren» respýblıkalyq oqý-saýyqtyrý ortalyǵynda sheteldegi qazaq dıasporalarynyń balalary kelip demalýda. Bul joly 300-ge jýyq sheteldegi qazaq balalaryn qabyldap otyrmyz. Olardyń demalýyna barlyq jaǵdaı jasalǵan. «Baldáýrenniń» bir aýysymda 600 balany qabyldaýǵa múmkindigi bar. Sondyqtan, keler jyly syrttan keletin qazaq balalarynyń sanyn odan ári arttyrý josparlap otyrmyz», - dep atap ótti vıtse-mınıstr.
Dúnıejúzi qazaqtary qaýymdastyǵy ókilderiniń aıtýynsha, bul jumys QR Tuńǵysh Prezıdenti Nursultan Nazarbaevtyń bastamasymen sheteldegi qazaq dısporlaryn qoldaý maqsatynda qolǵa alynyp, ondaǵy jetkinshekterge ana tilin úıretýdi kózdeıdi.
«Elimizdiń Tuńǵysh Prezıdenti - Elbasy Nursultan Nazarbaev Dúnıejúzi qazaqtarynyń V quryltaıynda sheteldegi aǵaıyndy Atamekendi umytpaı, ony árdaıym qurmet tutýǵa shaqyra otyryp, osy jolda sheteldegi qandastarymyzǵa qoldaý kórsetýdiń tetikterin anyqtaýdy tapsyrǵan bolatyn. Osy baǵyttaǵy sharalar aıasynda Dúnıejúzi qazaqtarynyń qaýymdastyǵy men «Otandastar» qory QR Bilim jáne ǵylym mınıstrliginiń qoldaýymen shet elderde turatyn qazaq dıasporasy ókilderiniń jas jetkinshekterine arnap arnaıy balalar ortalyǵyn uıymdastyrýda», dep atap ótti maýsymynyń ashylýynda Dúnıejúzi qazaqtary qaýymdastyǵy tóraǵasynyń orynbasary Arǵyn Ospanov.
Sonymen qatar, sharada «Otandastar» qorynyń vıtse-prezıdenti Maǵaýııa Sarbasov pen Reseı Federatsııasynyń Qazaqstandaǵy elshilik keńesshisi Kırıll Tıllıabev halyqaralyq balalar quryltaıynyń tıimdi tustaryna toqtaldy.
«Reseı Federatsııasynda resmı esep boıynsha bir jarym mıllıonǵa jýyq qazaq jergilikti jurtpen tatý-tátti tirshilik etýde. Olardyń týyp-ósken jeri - Reseı topyraǵy bolǵanymen, tarıhı Otany – Qazaqstan», - dedi Kırıll Gennadevıch. – Meniń oıymsha bálkim odan da kóp bolýy múmkin. Aýmaly-tókpeli talaı zaman ótti ǵoı. Biz ejelden dostyq qarym-qatynastaǵy elmiz. Osy balalar memleketterimizdiń arasyndaǵy shynaıy dostyqty odan da bekite túsetin urpaq».
«Baldáýrende» tynyǵýǵa kelgen qandastarymyzdyń balalary ózderiniń alǵashqy áseri týraly aıtty. Sonyń biri – Reseıdiń Ivanov oblysynan kelgen mektep oqýshysy Ámına Jaqsylyqova «Baldáýren» ózine unaıtynyn jáne osynda úshinshi ret kelip otyrǵanyn atap ótti.
«Men Reseıden keldim. Biz Ivanov oblysynyń Ivanov qalasynda turamyz. «Baldáýrenge» úshinshi ret kelip otyrmyn. Maǵan «Baldáýren» qatty unaıdy. Osy jerde ártúrli elderden kelgen qazaq balalarymen tanystym. Eger múmkindik bolyp jatsa, osy jerge taǵy da keler edim», - deıdi Ámına Jaqsylyqova.
Al, Mońǵolııa elinen kelgen 9-synyp oqýshysy Aıdana Dosymbek «Baldáýren» ana tilin jetildirýge kómektesetinin aıtýda.
«Men Mońǵolııa astanasy - Ulan-Batyrda turamyn. Onda qazaq mektepteri joq. Men mońǵol tilinde dáris beretin mektepte oqımyn. Biraq Mońǵolııada bizder, qazaqtar ózara ana tilimizde sóılesemiz. Qazaqstanda bizdiń kóptegen týystarymyz turady, olardyń kópshiligin tanımyn. «Baldáýrende» alǵash ret bolyp turmyn, maǵan qatty unady, taǵy da kelgim keledi. Barlyǵy 24 bala keldik. Meniń osy lagerge baratynymdy estigen synyptastarymnyń basym kópshiliginiń kelgileri keldi. Bul meniń oıymsha, odan arǵy oqýyma ári til bilýimdi jetildirýge kómektesedi», - dedi Aıdana Dosymbek.
Eki aptalyq jazǵy demalys maýsymynda shetelden kelgen qazaq balalarynyń belsendi demalýyna, ártúrli mádenı jáne sport sharalaryna qatysýyna, eń bastysy - ana tilin meńgerýine múmkindikter usynylady.