Shetelde Qazaqstannyń jasandy uryqtandyrý jáne tis emdeý qyzmetteri tanymal - DSM

NUR-SULTAN. QazAqparat – Qazaqstannyń joǵary tehnologııalyq medıtsınalyq kómek alý úshin sheteldikterdi elge shaqyrýǵa múmkindigi jetedi. Bul týraly QR Densaýlyq saqtaý birinshi vıtse-mınıstri Marat Shoranov Shanhaı Yntymaqtastyq Uıymyna múshe memleketteri Densaýlyq saqtaý mınıstrleriniń besinshi keńesinde aıtty, dep habarlaıdy QazAqparat vedomstvo saıtyna silteme jasap.

«Medıtsınanyń birqatar baǵyttary halyqaralyq deńgeıde tabysty básekelese bastady. Bizdiń ortalyqtar Ortalyq Azııa óńirinde jetekshi ortalyqtarǵa aınaldy, olar medıtsınalyq qyzmet kórsetý sapasy men deńgeıiniń álemdik standarttaryna sáıkes keledi», - dep atap ótti Marat Shoranov.

Spıker Qazaqstanda sheteldik azamattardy joǵary tehnologııalyq medıtsınalyq kómek alý úshin shaqyrýǵa múmkindik beretin barlyq jaǵdaı jasalǵanyn habarlady. Qazirgi ýaqytta osyndaı qyzmettiń 80 túri boıynsha qoljetimdilik qamtamasyz etilgen. Elimizde ıadrolyq medıtsına, qaterli isikterdi emdeýge arnalǵan 2 tomoterapııa ortalyǵy jáne «Gamma-pyshaq» kesheni jumys isteıdi.

«Sheteldik patsıentter arasynda eń tanymal qyzmetter tiziminde ekstrakorporaldyq uryqtandyrý jáne stomatologııalyq qyzmetter bar», - dep kórsetilgen mınıstrlik habarlamasynda.

Aıta ketsek, medıtsınalyq uıymdardy tsıfrlandyrý arqasynda emhanalardaǵy kezek 2 esege qysqarǵan.