Shetel valıýtasyna qatysty dúrbeleń basylǵan soń, teńge baǵamy nyǵaıdy – mınıstr

NUR-SULTAN. QazAqparat – Ulttyq ekonomıka mınıstri Álibek Qýantyrov teńge baǵamynyń nyǵaıýyna qatysty túsinik berdi, dep habarlaıdy QazAqparat tilshisi.

Parlament Májilisinde tilshiler mınıstrden kóktemde teńge baǵamynyń qunsyzdanýynyń sebebin surady.

«Ondaǵy sebepterdiń birine toqtalsaq, valıýta baǵamyna qatysty dúrbeleń boldy. Bıznestiń keıbir túrleri men halyqtyń bir bóligi AQSh dollaryn jappaı satyp ala bastady. Sonyń saldarynan teńge baǵamyna qysym jasaldy. Osydan keıin bul jaǵdaı turaqtanǵanyn, teńge baǵamy nyǵaıǵanyn kórip turmyz», - dedi Á. Qýantyrov.

Osy oraıda naýryz aıynda Úkimet bıýdjetti naqtylaǵanyn, sondaı-aq 1 dollar úshin 460 teńge deńgeıinde boljamdy baǵam engizilgenin eske saldy.

«Bizdiń ekonomıkada ósim bar ekeni barshaǵa málim. Bıylǵy tórt aıdyń qorytyndysy boıynsha 4,4 paıyz boldy. Atap aıtqanda, valıýta baǵamyna qatysty dúrbeleń basyldy. Úkimet Ulttyq bankpen jáne Qarjy naryǵyn retteý jáne damytý agenttigimen birelese ekonomıkany turaqtyrý boıynsha tıisti qadamdardy júzege asyryp jatyr», - dedi mınıstr.

Sonymen qatar ol sońǵy aılarda Ulttyq bank ınterventsııalary júrgizilmegenin jetkizdi.

Budan buryn habarlanǵandaı, Ulttyq bank tóraǵasy Ǵalymjan Pirmatovtyń ishki valıýta naryǵyndaǵy jaǵdaı turaqtanǵandyqtan, Ulttyq bank sáýir aıynda valıýtalyq ınterventsııalardy júrgizbegenin aıtty.

25 mamyrdaǵy málimet boıynsha Qor naryǵynda dollar 416 teńgeden saýdalandy.