Shetel saıasatkerleriniń QR zerthanalary jaıly málimdemesi negizsiz - Aqylbek Kúrishbaev
«Osy múmkindikti paıdalana otyryp, bizdiń BSL-3 deńgeıindegi bıologııalyq zerthanalarymyzdyń jumysyna qatysty tıisti túsiniktemeler bergim keledi. Birinshiden, olar 2-shi jáne 3-shi toptaǵy asa qaýipti patogendi mıkroorganızmderge qarsy dıagnostıkalyq jáne profılaktıkalyq preparattardy ázirleýmen aınalysady, ıaǵnı ólim-jitim deńgeıi joǵary 1-shi toptaǵy asa qaýipti vırýstar munda anyqtalmaıdy. Ekinshiden, bul zerthanalar Qazaqstan Respýblıkasyna tıesili jáne ózekti ekonomıkalyq máselelerdi sheshý úshin respýblıkalyq bıýdjetten tolyq qarjylandyrylady. Olar shetelden granttar almaıdy jáne de munda sheteldik ǵalymdar jumys istemeıdi, basqasha aıtqanda, zerthanalarymyz óz qyzmetinde shet memleketterge esep bermeıdi», - dedi A. Kúrishbaev bıologııalyq qaýipsizdikke qatysty qujatty talqylaý kezinde.
Osy oraıda ol atalǵan zerthanalar qupııa ne jabyq nysandar bolyp sanalmaıtynyn, olardyń jumysy ashyq jáne kez kelgen ýaqytta halyqaralyq sarapshylardyń tekserýinen ótý múmkindigi bar ekenin atap ótti.
«BSL-3 ǵylymı zerthanalarynyń qurylysyn qazaqstandyq mamandar Úkimettiń tolyq baqylaýymen júrgizdi. AQSh sarapshylaryn biz ǵylymnyń sońǵy jetistikteri men ozyq tájirıbeni eskere otyryp, osy zerthanalardyń bıoqaýipsizdigine kepildik berý úshin ǵana tarttyq. Qazaqstan bakterıologııalyq (bıologııalyq) jáne ýytty qarýǵa tyıym salý jónindegi Konventsııanyń jaýapty qatysýshysy bolyp otyr. Elimizdiń Prezıdenti Qasym-Jomart Toqaevqa osy saladaǵy birqatar mańyzdy bastamalar tıesili. Atap aıtqanda, Memleket basshysy BUU Qaýipsizdik Keńesine esep beretin arnaıy kópjaqty organ – Bıologııalyq qaýipsizdik jónindegi halyqaralyq agenttik qurýdy usyndy», - dedi senator.
«Búgin Senatta talqylanǵan osy zań jobasynda Qazaqstanda bakterıologııalyq (bıologııalyq) jáne ýytty qarýlar jasaý, óndirý jáne olardyń qorlaryn jınaqtaý maqsatynda patogendi bıologııalyq agentterdiń aınalysyna tyıym salynatyny taǵy da aıtylady. Osyǵan baılanysty, sheteldik saıasatkerlerdiń Qazaqstannyń atalmysh zerthanalary shet memleketterdiń baqylaýymen áskerı-bıologııalyq qyzmetpen aınalysa alady degen málimdemesi múldem negizsiz ekendigin atap ótkim keledi», - dedi Aqylbek Kúrishbaev.
Budan buryn habarlanǵandaı, búgin Senattyń jalpy otyrysynda «Qazaqstan Respýblıkasynyń bıologııalyq qaýipsizdigi týraly» Qazaqstan Zańy qabyldandy .