Shetel ónerpazdary Qurmanǵazy kúılerin oryndaýdan saıysqa túsedi

ALMATY. QazAqparat - QR Mádenıet jáne sport mınıstrliginiń uıymdastyrýymen 2018 jyldyń 30 qyrkúıegi men 2 qazan kúnderi kúıshi Qurmanǵazy Saǵyrbaıulynyń 200 jyldyq mereıtoıy aıasynda «Qurmanǵazy jáne Uly dala sazy» atty Halyqaralyq festıval ótedi. Kúı merekesi Astananyń 20 jyldyq mereıtoıyna arnalyp otyr, dep habarlaıdy QazAqparat tilshisi. 

Sharanyń negizgi uıymdastyrýshysy - Qurmanǵazy atyndaǵy Qazaq memlekettik akademııalyq halyq aspaptar orkestri. Almatyda ótetin dúbirli sharaǵa Reseı, Qyrǵyz Respýblıkasy, Ózbekstan jáne ózge de elderden sahna sańlaqtary keledi. 

Sheteldik óner ıeleri men otandyq kúıshiler arasynda kúıtartys josparlanǵan. Dombyra tartysy Qurmanǵazynyń «Balbyraýyn» kúıinen bastaý alyp, «Adaı» kúıimen aıaqtalady.

Almatylyqtar tórt kún boıy tegin dástúrli mýzyka týyndylaryn tyńdap, kúmbirlegen kúımen qulaq quryshyn qandyra alady. 

«Rýhanı jańǵyrý» baǵdarlamasy aıasynda uıymdastyrylyp otyrǵan is-sharaǵa «ıÝNESKO» shtab-páterinen, «TÚRKSOI» uıymynan, Reseı Federatsııasynan arnaıy ókilder, jaqyn jáne alys shet elderdiń jetekshi dástúrli oryndaýshylary, Qyrǵyzstan, Reseı, Ózbekstan Respýblıkalarynyń óner ujymdary jáne elimizdiń «akademııalyq» dárejesi bar orkestrleri qatysady.

Úsh kúnge sozylatyn sharada «I Respýblıkalyq dástúrli oryndaýshylar forýmy», respýblıkamyzdyń, jaqyn shet elderdiń kúıshilik mektebi maıtalmandarynyń kontserti, respýblıkamyzdyń, jaqyn shet elderdiń ult aspaptar orkestrleriniń kontserti, orkestrler sherýi josparlanǵan.

Sonymen qatar, memlekettik syılyqtyń laýreaty, sýretshi Shahan Mahanbetov pen tanymal fototilshi Rafhat Halelovtiń «Kúı jáne kúıshi» atty fotokórmesi uıymdastyrylmaq.