Shetel ınvestorlary keńesi jetildiriledi

NUR-SULTAN. QazAqparat – QR Prezıdenti janyndaǵy shetel ınvestorlary keńesiniń qyzmeti jetildiriledi. Bul QR Syrtqy ister mınıstrliginiń Investıtsııa komıteti tóraǵasynyń mindetin atqarýshy Ardaq Zebeshev málim etti, dep habarlaıdy QazAqparat tilshisi.

«Shetel ınvestorlary keńesiniń quramyna buryn bolmaǵan salalardan jańa músheler qosý, sonymen qatar keńeske múshe kompanııalarmen problemaly suraqtardy talqylaý úshin aı saıyn taqyryptyq kezdesýler ótkizý arqyly ony jetildirýge baǵyttalǵan tıisti usynys ázirlendi», - dedi ol Ortalyq kommýnıkatsııalar qyzmetindegi baspasóz máslıhaty barysynda.

Onyń atap ótýinshe, QR Premer-Mınıstriniń tóraǵalyǵymen Investıtsııalyq shtab qurylǵan. Onyń aıasynda sheteldik ınvestorlarmen týyndaǵan problema suraqtar turaqty qaralyp, ınvestıtsııalyq jobalardy júzege asyrýǵa qatysty máseler talqylanyp otyrady. Sonymen qatar «KAZAKH INVEST» UK» AQ pen «AHQO» bazasynda ınvestorlarmen tıimdi ózara is-qımyldy arttyrý úshin arnaýly kelissóz komandasy - Task Force qurylǵan.

«Atalǵan bólimshe mańyzdy strategııalyq jobalardy ázirleý barysynda sheteldik kompanııalarmen Úkimet atynan jalǵyz kelissózshi bolady», - dedi Ardaq Zebeshev.