Shetel ınvestorlary Qazaqstan naryǵyna asa qyzyǵýshylyq tanytyp otyr – Atameken

NUR-SULTAN. QazAqparat – Qazirgi geosaıası jaǵdaı Qazaqstannyń bıznes naryǵyna jańa múmkindikter berip otyr. Bul týraly «Atameken» ulttyq kásipkerler palatasynyń basshysy Raıymbek Batalov málim etti, dep habarlaıdy QazAqparat tilshisi.

«Geosaıası jaǵdaıǵa baılanysty bıznestiń damýynda logıstıka boıynsha máseleler bar. Taýar, ónimdi jetkizýdiń úzilip, toqtap qalýy - aýqymdy problema. Atalǵan jaıttardy biz Úkimetpen birge jedel shtab otyrysy men jumys toptary alańynda talqylap jatyrmyz. Kóptegen másele jedel sheshilip jatyr. Dollar baǵamy da mańyzdy ról atqarady. Jalpy alǵanda, jaǵdaı turaqtalyp keledi. Bıznesti damýynda bank jáne qarjy sektorynyń alatyn orny erekshe. Qazaqstan aýmaǵynda jumys istegen reseılik banktermen problemalar bolǵanyn bilemiz», - dedi Raıymbek Batalov elordalyq kásipkerlermen kezdesý barysynda.

Sondaı-aq, ulttyq kásipkerler palatasynyń basshysy, elimizge shetel ınvestorlary qyzyǵýshylyǵynyń artqanyn aıtty.

«Basqa jaǵynan alǵanda, geosaıası jaǵdaı biz úshin jańa múmkindikter ashyp otyr deýge bolady. Óıtkeni, buǵan deıin qazaqstandyq bızneste bolmaǵan nemese az úleste bolǵan salalar endigi ýaqytta qoljetimdi. Sonymen qatar, tek reseılik nemese ýkraındyq emes, basqa da shetel ınvestorlary Qazaqstan naryǵyna asa qyzyǵýshylyq tanytýda. Sebebi Qazaqstan - Qytaı jáne TMD naryǵy arasyndaǵy altyn kópir. Biz bul múmkindikterdi tıimdi paıdalanýymyz qajet», - deıdi ol.

Aıta ketsek, búgin Nur-Sultan qalasy kásipkerler palatasynyń óńirlik keńesiniń otyrysy ótti.

Atalǵan jıynda bıznes qoǵamdastyqtyń kún tártibindegi júıeli máseleler qozǵaldy.