Shetel elshileri QR Beıbit jıyndar týraly zań jobasymen tanysty

NUR-SULTAN. QazAqparat - QR Syrtqy ister mınıstrliginde dıplomatııalyq korpýs ókilderi Beıbit jıyndardy uıymdastyrý men ótkizý tártibi týraly zań jobasyn talqylady, dep habarlaıdy QazAqparat tilshisi.

QR Aqparat jáne qoǵamdyq damý mınıstrliginiń jaýapty hatshysy Janat Qojahmetov zań jobasyn ázirleýde halyqaralyq tájirıbe men qoǵamdyq pikirler eskerilgenin atap ótti.

«Parlament Májilisiniń jumys toptarynyń otyrysyna quqyq qorǵaý uıymdary, halyqaralyq uıymdar, úkimettik emes sektor ókilderi jáne ǵalym-sarapshylar belsendi qatysty. Qoǵamdyq talqylaý qorytyndysy boıynsha zań jobasyna Májiliste birqatar ózgeris engizildi. Qazirgi ýaqytta zań jobasy Parlament Senatynda qaralyp jatyr», - dedi Janat Qojahmetov.

J. Qojahmetov elshilerge zań jobasynyń negizgi tujyrymdary jóninde aıtyp berdi.

«Zańnamalyq deńgeıde beıbit jıyndardyń negizgi ustanymdary engizilip jatyr: zorlyqqa jol bermeý, zańdylyq, qoǵamdyq tártiptiń qaýipsizdigin qamtamasyz etý, densaýlyqty saqtaý, tulǵalardyń bostandyq quqyǵyn qorǵaý, qatysý eriktiligi jáne t.b. Májiliste talqylaýda taǵy eki ustanym - beıbit jıyn ótkizý prezýmptsııasy men jaýapkershilik. Bul ustanym jıyn qatysýshylary men uıymdastyrýshylardyń ǵana emes, memlekettik organdar men bıliktiń de jaýapkershiligin bildiredi», - dedi spıker.

Onyń aıtýynsha, mundaı ustanymdardy engizý EQYU Demokratııalyq ınstıtýttar jáne adam quqyqtary bıýrosy ázirlegen beıbit jıyndar erkindigi ustanymdaryna sáıkes keledi.

«Sonymen birge, zań jobasynda uǵymdyq apparat engizý qarastyrylǵan. Bul pıket, narazylyq, sherý, mıtıng syndy beıbit jıyn túrleri men negizgi túsinikterdi qalyptastyrýǵa múmkindik beredi. Qoldanystaǵy zańda mundaı túsinik joq jáne zań tájirıbesinde de beıbit jıyn qatysýshylary men uıymdastyrýshylary tarapynan narazylyq týdyratyn», - dedi Janat Qojahmetov.

Jaýapty hatshy Májiliste zańda kórsetilgen oryndardan basqa barlyq jerde ótkizýge bolatyn norma qabyldanǵanyn jetkizdi.

«Qazirgi ýaqytta Senattaǵy jumys toby aıasynda iri qalalardyń ortalyq bóligindegi arnaıy oryndar sanyn anyqtaý boıynsha norma qarastyrylyp jatyr. Eger bul norma qabyldansa, Nur-Sultandaǵy arnaıy oryndar sany eń kemi 12-ge, Almatynyń ortalyq bólikterindegi arnaıy oryndar sany - 24-ke jetedi», - dedi Janat Qojahmetov.

Otyrys barysynda Qazaqstandaǵy elshiler zań jobasy týraly óz pikirlerin bildirip, usynymdaryn aıtty.

QR Syrtqy ister vıtse-mınıstri Erjan Ashyqbaev halyqaralyq seriktester tarapynan túrli usynymdar túskenin jáne olardyń eskeriletinin atap ótti.