Shetel azamattary vızany elimizdiń kez kelgen HQO-synan ala alady

NUR-SULTAN. QazAqparat – Endigi ýaqytta shetel azamattary Qazaqstanda ýaqytsha turýǵa ruqsat alý jáne vıza ázirleýdi elimizdiń kez kelgen halyqqa qyzmet kórsetý ortalyǵynan ala alady. Atalǵan qyzmet jyl sońyna deıin barlyq HQO-da qoljetimdi bolmaq. Bul týraly QR Іshki ister mınıstriniń orynbasary Sáken Sársenov málim etti, dep habarlaıdy QazAqparat tilshisi.

«Elimizge jylyna shamamen 1,5 mıllıon shetel azamaty keledi. Osy oraıda, ótken jyldyń 1 qańtarynan bastap biz olarǵa kóshi-qon polıtsııasynda ýaqytsha tirkelý talabyn joıdyq. Bul elimizge ınvestıtsııa tartý men ishki týrızmdi ilgeriletýde oń áserin tıgizdi. Búginde sheteldik qonaqtar Qazaqstanǵa kelgeni týraly kóshi-qon polıtsııasyna «e-Qonaq» mobıldi qosymshasy arqyly habarlaý múmkindigi bar», - dedi Sáken Sársenov OKQ-de ótken baspasóz máslıhatynda.

Sondaı-aq, mınıstrdiń orynbasary shetel azamattaryna beriletin vızaǵa qatysty jańashyldyqpen bólisti.

«Nur-Sultan jáne Almaty qalasynyń halyqqa qyzmet kórsetý ortalyqtarynda shetel azamattaryna ýaqytsha turýǵa ruqsat berý jáne vıza ázirleý úshin biryńǵaı qyzmet kórsetý sektory quryldy. Jyl sońyna deıin atalǵan qyzmet túrin elimiz boıynsha barlyq halyqqa qyzmet kórsetý ortalyqtarynda qoljetimdi bolýyn josparlap otyrmyz», - deıdi ol.