Shet memleketterdiń basshylary Qazaqstan halqyn Táýelsizdik kúnimen quttyqtady

<p>Qazaqstan Respýblıkasynyń Táýelsizdik kúnine oraı Prezıdent Qasym-Jomart Toqaevtyń atyna shet memleketterdiń basshylary men halyqaralyq uıymdardyń jetekshilerinen quttyqtaý jedelhattary kelip túsip jatyr, dep habarlaıdy <a href="https://kaz.inform.kz/" target="_blank" rel="noopener">Kazinform</a> Aqordanyń baspasóz qyzmetine silteme jasap.&nbsp;&nbsp;</p>

Ózbekstan Prezıdenti Shavkat Mırzıeev Qasym-Jomart Toqaevty jáne baýyrlas Qazaqstan halqyn Táýelsizdik kúni merekesimen quttyqtady.

– Táýelsizdik jyldarynda dostas Qazaqstan Respýblıkasy túrli salada aýqymdy ózgerister men túbegeıli reformalar júrgizgenin, Sizdiń elińizdiń halyqaralyq arenadaǵy abyroıy men bedeli artyp kele jatqanyn atap ótkim keledi, – delingen jedelhatta.

Qyrǵyzstan Prezıdenti Sadyr Japarov Memleket basshysyn Táýelsizdik kúni merekesimen quttyqtady.

– Árbir qazaqstandyq úshin teń múmkindikterge jol ashatyn Jańa jáne Ádiletti Qazaqstandy qurý jónindegi mańyzdy jospardy júzege asyrý jolynda atqaryp jatqan aýqymdy jumysyńyz qoǵam tarapynan joǵary baǵalanatynyna jáne tarıhta óz ornyn alatynyna senimdimin, – dep jazylǵan jedelhatta.

Tájikstan Prezıdenti Emomalı Rahmon Qazaqstannyń Táýelsizdik kúnine oraı joldaǵan quttyqtaý jedelhatynda baýyrlas qazaq halqyna beıbitshilik jáne baq-bereke tilegen.

– Táýelsizdik jyldarynda Qazaqstan Respýblıkasy qoǵam ómiriniń barlyq salasynda mol tabysqa qol jetkizip, halyqaralyq arenada joǵary bedelge ıe boldy jáne búginde progress pen órkendeý jolynda alǵa qaraı senimdi túrde qadam basyp keledi, – dep jazǵan Tájikstan Prezıdenti.

Túrikmenstan Prezıdenti Serdar Berdimuhamedov Qazaqstan Prezıdentin Táýelsizdik kúni merekesimen quttyqtap, halyqtarymyzdy ǵasyrlar boıǵy dostyq pen tatý kórshilik qatynastar baılanystyratynyn atap ótken.

Sonymen qatar Qazaqstan Respýblıkasynyń Táýelsizdik kúnine oraı quttyqtaý jedelhattaryn BAÁ Prezıdenti Muhammed ben Zaıd Ál Nahaıan, BAÁ Vıtse-prezıdenti, Premer-mınıstri, Dýbaı Ámirliginiń Bıleýshisi Muhammed ben Rashıd Ál Maktým, Saýd Arabııasynyń Koroli Salman ben Ábdelazız Ál Saýd jáne Saýd Arabııasy Koroldiginiń Taq murageri Muhammed ben Salman ben Ábdelazız Ál Saýd, Indonezııa Prezıdenti Djoko Vıdodo, Horvatııa Prezıdenti Zoran Mılanovıch, Paragvaı Prezıdenti Santıago Penıa, Gana Prezıdenti Nana Addo Dankva Akýfo-Addo, Túrikmenstan Halk Maslahatynyń tóraǵasy Gýrbangýly Berdimuhammedov, GFR-dyń burynǵy Federaldy Prezıdenti Horst Keler, GFR-dyń burynǵy Federaldy Kantsleri Gerhard Shreder, TMD Bas hatshysy Sergeı Lebedev jáne basqalar joldady.