Shet elde júrgende jerimizdi, tilimizdi, týymyzdy maqtan tutamyz - akrobat-gımnast

ALMATY. QazAqparat -Táýelsizdigimizdiń qurdasy Ádilet Tıqanov Almaty tsırkiniń ártisi. Jas akrobat-gımnast túrli halyqaralyq festıvalderge qatysyp, Qazaqstannyń maqtanyshyna aınaldy. Ol barsha otandastaryn Táýelsizdik kúnimen quttyqtap, aldaǵy josparymen bólisti, dep habarlaıdy QazAqparat tilshisi.

- Ádilet, eń aldymen ózińiz týraly aıtyp berseńiz?

- Men 1991 jyly 21 qyrkúıekte Pavlodar qalasynda dúnıege keldim. 1999 jyly Almaty oblysyna kóship keldik. Talǵar aýdanyna qarasty Panfılov aýylynda ornalasqan mektepte oqydym. Bala kúnimde aǵam sııaqty polıtsııa bolýdy armandadym. Ol kisiniń men úshin orny bólek. Sebebi, aǵam meni tárbıelep, ósirdi. Keıin joǵary synypqa kóshkende bı, breık-dans, parkýr, kóshe akrobatıkasyna qyzyqtym. Meniń dostarym Júsipbek Elebekov atyndaǵy respýblıkalyq estrada-tsırk kolledjiniń tsırk bólimine oqýǵa tústi. Solarǵa qarap qyzyqtym meniń de sol oqýǵa túskim keldi. Keıin armanym oryndalyp tsırk kolledjiniń stýdenti atandym.

- Siz úshin Táýelsizdik degen ne?

- Men ózimdi osy Táýelsizdik alǵan jyly dúnıege kelgenimdi maqtan tutamyn. Sebebi, kóp nárse ózgerdi. Biz úlken damýdyń kýási boldyq. Bizdiń keremet astanamyz bar. Men álemniń jartysyn aralap kórdim, sonda baıqaǵanym bizdiń Qazaqstan damyǵan elderden esh kem emes. Meniń oıymsha, ekonomıkamen qatar bizdiń mádenıetimiz de jaqsy damyp, órkendep keledi.

Jastarǵa úlken qoldaý bar, jas urpaqtyń kóptegen múmkindikteri bar. Balalar - ult bolashaǵy, bizdiń Úkimet olarǵa eń aldymen qamqorlyq jasaıdy!

- Otbasyn qurdyńyz ba?

- Iá. Áıelim ekeýmiz bir jerde jumys isteımiz.Temirlan esimdi bes jasar ulymyz bar. Ulymdy ózim jattyqtyramyn. Ol bizben birge «Central Asia Got Talent» talanttar shoýyna qatysty. Eger ulym bolashaqta basqa mamandyq tańdasa, men ony mindetti túrde qoldaımyn. Alaıda, ol maǵan uqsaǵysy keletinin aıtady.

- Aldaǵy josparyńyz qandaı?

- Men tsırk ártisimin jáne ony maqtan tutamyn. Álemniń jartysyn aralap túrli tsırk festıvaline qatystym. Qazaqstanyń atynan maqtanyshpen shyǵamyn. Qorjynymyzda «altyn», «kúmis» jáne «qola» gran-prı bar. Ár túrli elderden arnaıy syılyqtar aldyq. Qytaı, Ýkraına elderindegi «Central Asia’s Got Talent» televızııalyq talanttar shoýyna qatystyq. Qańtar aıynda British Got Talent brıtandyq talanttar baıqaýyna qatysýdy josparlap otyrmyz. Alda kóptegen maqsat men jańa armandar bar!

- Tsırk ártisi bolý úshin qandaı qasıet qajet?

- Birinshiden, bul tsırk ónerine degen súıispenshilik. Kez kelgen tsırk ártisi óz óneriniń jankúıeri. Biz óner adamdarymyz jáne óz kásibimizge adalmyz. Tsırk ártisi bolý ońaı sharýa emes. Ol shydamdylyq pen eptilikti qajet etedi. Árıne, nátıjege jetý úshin kóp jumys isteý qajet. Árdaıym formada bolý kerek. Uıqy, tamaq jáne jattyǵýlar biz úshin ajyramas uǵym.

- Qazaqstanyń bolashaǵyn qalaı elestetesiz?

- Táýelsizdik qazaq halqyna qanat jaıýǵa múmkindik berdi, damýǵa serpin berdi. Biz shetelde júrgende jerimizdi, tilimizdi, týymyzdy maqtan tutamyz. Aldaǵy onjyldyqta men Qazaqstandy álemniń damyǵan elderiniń qatarynan kóremin. Biz buǵan birlesken kúsh-jigermen kelemiz. Bul jerde bizdiń jastarymyz, sonyń ishinde biz de erekshe ról atqaramyz.

Osy múmkindikti paıdalana otyryp, men barsha qazaqstandyqtardy Táýelsizdik kúnimen quttyqtaımyn! Myqty densaýlyq pen úlken jetistikter tileımin!

Jastardyń mindeti - táýelsizdigimizdi saqtaý jáne myzǵymas qundylyqtarymyzdy balalarǵa jetkizý.

- Áńgimeńizge rahmet!