Shet elde qalǵan qazaqstandyqtardy ákelýge barlyq kúsh-jiger jumylady - Air Astana

NUR-SULTAN. QazAqparat – Air Astana avıakompanııasy shet elderde qalǵan qazaqstandyqtardy elge ákelýge barlyq kúsh-jigerin jumsaıdy. Bul týraly QazAqparat atalǵan áýe kompanııasynyń baspasóz qyzmetine silteme jasap habarlaıdy.

«Qazirgi ýaqytta Ystanbulda 500-den astam jolaýshy qalyp otyr. Búgin bizdiń avıakompanııa Nur-Sultan-Ystanbul reısin jasaıdy. Ystanbulǵa ushyp shyǵý ýaqyty 19:05, al qoný ýaqyty shamamen 21:25 dep otyrmyz. Ystanbuldan keri qaıtý reısi 22:25 saǵatty, elge kelý shamamen 06:10 saǵatta. Barlyq jerlerde jergilikti ýaqyt kórsetilgen», - deıdi avıakompanııa baspasóz qyzmeti.

Eske salsaq, buǵan deıin myńnan astam qazaqstandyq týrıst Túrkııadan kele almaı otyrǵany habarlanǵan. Qazaqstannyń dıplomattary avıajolaýshylarǵa quqyqtyq, aqparattyq qoldaý kórsetetin arnaıy shtab qurdy. Budan bólek, Ystanbulda turatyn qandastarymyz da ózderiniń qoldaýlaryn jasap jatyr. Qazirgi ýaqytta qazaqstandyqtar Qazaq-túrik qorynyń keńsesine jaıǵasqan. Olarǵa barlyq qoldaý, kómekter berilýde.