Sheshim qabyldaýdyń baıaýlyǵy ulttyq qaýipsizdikke qater tóndiredi – Prezıdent
«Norma shyǵarý máselelerin qaıta qarastyrý qajet. Karantın kezinde quqyq júıesiniń baıaýlyǵy kóp kedergi keltirdi. Tótenshe jaǵdaı rejımin engizip, tótenshe jarlyq qabyldaýǵa týra keldi. Biraq mundaı sharalar krızıstik jaǵdaılarǵa júıeli túrde jaýap bere almaıdy. Negizgi másele – atqarýshy bılik qyzmetindegi shekten tys zańnamalyq reglamentteýde jatyr», - dedi Prezıdent Qazaqstan halqyna Joldaýynda.
Prezıdent mınıstrler men ákimderden talap etiletinin, biraq olardyń quzireti zańdar men qaýlylardyń egjeı-tegjeıli normalarymen shektelgenin atap ótti.
«Bul memlekettik apparattyń ǵana emes, Parlamenttiń de jumysyna júkteme bolady. Onyń palatalary detalızatsııalanǵan normalardy qarastyrýǵa májbúr bolady. Muny atqarýshy organdardyń quziretine berýge de bolar edi. Qazirgi ózgermeli álemde sheshim qabyldaýdyń baıaýlyǵy ulttyq qaýipsizdikke qater tóndiredi. Sondyqtan, quqyqtyq saıasat tujyrymdamasy aıasynda zańnamany ózgertý arqyly quqyqtyq reglamentteý deńgeıleri arasynda balansty qamtamasyz etý kerek. Muny keshiktirýge bolmaıdy», - dedi Q. Toqaev.
Aıta keteıik, búgin Memleket basshysy Qasym-Jomart Toqaev Parlament palatalarynyń birlesken otyrysynda Qazaqstan halqyna jyl saıynǵy dástúrli Joldaýyn jarııalaýda.
Joldaýdy barlyq respýblıkalyq telearnalar tikeleı efır arqyly kórsetip, negizgi radıostantsııalar tikeleı tolqynda taratady.