Sherýshiler Frantsııada merdiń úıin qıratty

PARIJ. QazAqparat - Frantsııanyń Val-de-Marn departamentindegi L'Aı-le-Roz qalasynyń meri Vınsent Janbrýn jeksenbi kúni tańerteń úıine shabýyl jasalǵanyn málimdep, muny eldegi tártipsizdikter aıasynda óz otbasyn «óltirý áreketi» dep atady, dep habarlaıdy QazAqparat SNN-ge silteme jasap.

«Aldyńǵy úsh túndegideı túngi saǵat 1:30-da qalalyq merııada bolǵanymda, meniń úıimdi kólikpen soǵyp, sodan keıin ony órteý áreketi jasaldy. Osy kezde úıde jubaıym men eki kishkentaı balam boldy, olar uıyqtap jatqan. Jubaıym men balalarymnyń biri shabýyldaýshylardan qorǵanýǵa tyrysqanda jaraqat aldy», - delingen mer málimdemesinde.

V.Janbrýn polıtsııaǵa jáne qutqarý qyzmetterine kómekteskeni úshin alǵys aıtty.

Eske salaıyq, Frantsııada Aljır týmasy 17 jastaǵy Nahel Merzýkti polıtsııa óltirgennen keıin narazylyq tolqyny basylmaı tur. Apta basynda N.Merzýkti Nantera qalasynda polıtsııa qyzmetkeri atyp óltirdi. Ol senbi kúni Nantera meshitinde jerlendi.

Jas jigittiń ólimi Frantsııanyń margınaldy qaýymdastyqtaryndaǵy polıtsııa jumysy týraly pikirtalasty qaıta jandandyryp, násildik qatynas kisi óltirý faktoryna aınaldy ma degen suraqtar týǵyzdy.

Juma, 30 maýsymda jas jigittiń anasy Mýnııa «France 5» telearnasyna bergen suhbatynda ulynyń ólimine ony atyp óltirgen ofıtserdi ǵana kinálaıtynyn aıtty. Alaıda, bul ólim búkil elde aýqymdy tártipsizdikter týdyrdy.

Eldiń ishki ister mınıstrliginiń aldyn ala málimeti boıynsha, 700-den astam adam qamaýǵa alyndy.